Старшыня Камітэту кіраўнікоў штабоў Узброеных сілаў ЗША генерал Марк Мілі ў эфіры «Fox News» падзяліўся меркаваннем адносна вайны ва Украіне. Вайсковец адзначыў, што наступныя два тыдні мусяць вызначыць хаду і характар усёй вайны. У той жа момант ён адзначыў, што амерыканскія ўлады прыкладаюць максімум намаганняў для арганізацыі мірных перамоваў.
Амерыканскі генерал лічыць, што пасля працягу поўнамаштабнага ўварвання РФ сітуацыя ва Украіне можа стаць яшчэ больш сур’ёзнай. Паводле ягоных словаў, ЗША робяць крокі, каб гэтага не дапусціць. Адным з крокаў у такім напрамку, як сцвярджае Мілі, выступаюць перамовы.
«Мяркую, заўсёды ёсць магчымасць эскалацыі. Нам неабходна назіраць за развіццём падзеяў і ацэньваць шанец далейшай эскалацыі. Мы гэтым займаемся. Менавіта таму вы бачылі міністра Остына, які размаўляе са сваім украінскім калегам, а я размаўляю са сваім расейскім калегам, каб не дапусціць разрастання гэтай вайны ў нешта яшчэ больш жудаснае, чым ёсць цяпер», – сказаў ён.
Мілі ўпэўнены, што наступныя некалькі тыдняў вайны ва Украіне стануць вызначальнымі.
«Цяпер на Данбасе працягваюцца баявыя дзеянні паміж украінскімі і расейскімі сіламі. Тое, як складзецца сітуацыя цягам наступных некалькіх тыдняў, у значнай ступені вызначыць далейшае развіццё вайны», – сказаў ён.
Мілі кажа, што вынікам баёў за Данбас можа стаць як пераход да пазіцыйнай вайны, так і перамога аднаго з бакоў. Ён лічыць, што найлепшым выхадам з вайны стануць мірныя перамовы, калі ўлічваць значныя страты з абодвух бакоў.
«Я мяркую, развязак праз перамовы быў бы лагічным выбарам. Але абодва бакі мусяць самастойна вызначыцца», – заявіў генерал.
У адваротным выпадку наступствамі падзеяў ва Украіне могуць стаць або вызначальная перамога аднаго з бакоў, або патавая сітуацыя, адзначыў Мілі.
Раман Лугоўскі belsat.eu