24 траўня Выбарчая камісія прыняла пастановы адносна выбарчых спісаў «Закон і правапарадак» і «Наша справа» на выбарах у Каардынацыйную раду. Пра гэта паведамілі ў КР.
У прыватнасці Выбарчая камісія пастанавіла зняць з выбараў у КР спіс «Закон і правапарадак» у якасці пакарання за выкарыстанне чат-бота плану «Перамога» для агітацыі.
Таксама камісія выключыла двух чальцоў са спісу «Наша справа» – Віктара Саскевіча і Андрэя Жукаўца, бо пасля сыходу з выбараў кандыдаткі Яны Цыгалкі спіс пераставаў адпавядаць гендарным квотам.
У камісіі палічылі, што выкарыстаннем спісам «Закон і правапарадак» чат-бота плану «Перамога» для агітацыі было здзейсненае невыкананне правілаў бяспекі, прапісанае ў Мемарандуме як прыярытэтнае і пад чым падпісваліся ўсе чальцы спісаў для рэгістрацыі на выбарах. Камісія прапанавала спісу выключыць за гэта свайго лідара Аляксандра Азарава, але каманда на гэта не пагадзілася.
Што датычыць спісу «Наша справа», то з яго праз ціск сілавікоў сышла адна кандыдатка. Рашэннем Выбарчай камісіі кіраўніцы спісу Розе Турарбекавай далі час на тое, каб прывесці спіс у адпаведнасць з правіламі Палажэння, то бок выдаліць са сваёй каманды двух мужчынаў.
Якуб Хруст belsat.eu
