Расейскі губернатар хоча адпраўляць на беларускія курорты вайскоўцаў, пацярпелых на вайне ва Украіне
Пытанне рэабілітацыі расейскіх вайскоўцаў, параненых на вайне ва Украіне, абмяркоўваў з Лукашэнкам губернатар Ленінградскай вобласці Аляксандр Драздзенка, паведамляе БелТА.
«Мы дамовіліся пра выкарыстанне патэнцыялу беларускіх курортаў не толькі для жыхароў Ленінградскай вобласці, але і для тых, каму неабходна праходзіць рэабілітацыю, звязаную з атрыманнем інваліднасці ці траўмамі ў зоне СВА (так расейская і беларуская прапаганда называе вайну, распачатую Расеяй ва Украіне – рэд.). Аляксандр Рыгоравіч выказаў прапанову: давайце паглядзім на нашыя магчымасці, гатовыя тут аказаць дапамогу і падтрыманне», – распавёў пра вынікі сустрэчы з Лукашэнкам, што адбылася 24 чэрвеня, расейскі губернатар.
Паводле Аляксандра Драздзенкі, цяпер Беларусь наведваюць сем’і з дзецьмі з Ленінградскай вобласці, чые сужэнцы і бацькі ўдзельнічаюць у баявых дзеяннях ва Украіне:
«Паводле дамоўленасці грамадскіх арганізацыяў і пры падтрыманні Міністэрства ўнутраных справаў Беларусі нашыя сем’і прыехалі. Яны былі ў Менску, Берасці, сёння ў Хатыні, заўтра з’язджаюць. Водгукі вельмі пазітыўныя. Яны кажуць: «Мы як быццам прыехалі да сваіх сваякоў. Настолькі цёпла нас сустракаюць».
У беларускія санаторыі не аднойчы прывозілі дзяцей з акупаваных Расеяй тэрыторыяў Украіны. Афіцыйны Менск апраўдвае гэта аздараўленнем.
Украіна называе вываз дзяцей з акупаваных тэрыторыяў у Расею і Беларусь незаконным перамяшчэннем. Офіс генеральнага пракурора Украіны распачаў крымінальную справу паводле факту дэпартацыі больш як 19 тысяч дзяцей з Данбасу, Луганскай, Запарожскай, Херсонскай і Харкаўскай вобласцяў.
Міжнародны крымінальны суд у Гаазе выдаў ордар на арышт Уладзіміра Пуціна і дзіцячай омбудсвумен Марыі Львовай-Бяловай за незаконную дэпартацыю ўкраінскіх дзяцей з акупаваных тэрыторыяў Украіны.
Доказы таго, што ў Беларусь незаконна вывозяць украінскіх дзяцей з часова акупаваных Расеяй тэрыторыяў, былі перададзеныя ў Міжнародны крымінальны суд у Гаазе. Прадстаўнікі Народнага антыкрызіснага ўпраўлення спадзяюцца, што дзеянні рэжыму Лукашэнкі будуць кваліфікаваныя як ваеннае злачынства.
Марыя Міхалевіч belsat.eu
