Дональд Туск: Еўразвяз дапаможа ў стварэнні лініі абароны на мяжы з Беларуссю і Расеяй
Прэм’ер-міністр Польшчы Дональд Туск падчас прэс-канферэнцыі пасля саміту Рады Еўропы, на якім абіралася новае кіраўніцтва ЕЗ, распавёў, пра якую дапамогу ў абаронных праектах атрымалася дамовіцца з ЕЗ.
«Польшча атрымала 100% таго, што мы закладалі, калі казаць пра абаронныя праекты, якія датычаць бяспекі, – сказаў Туск. – Спрэчка была вельмі гарачая: упершыню я бачыў сітуацыю, калі Францыя і Нямеччына разам спрачаліся за рашэнні, а ўсе астатнія лідары падтрымалі пазіцыю Польшчы ў пытанні гэтых ключавых абаронных праектаў».
Прэм’ер-міністр удакладніў, што гаворка ідзе найперш пра два польскія праекты, адзін з якіх – «купал, шчыт, абарона еўрапейскага неба», праект агульнай СПА – рыхтаваўся разам з грэкамі.
«Справа ў тым, каб Еўропа ўзяла на сябе адказнасць за бяспечнае неба над Еўропай, а не асобныя дзяржавы, – зазначыў палітык. – Я ўпершыню магу з поўнай упэўненасцю сказаць, што ў Польшчы атрымалася мабілізаваць практычна ўсе іншыя краіны, і мы прасунулі нашую ідэю. <…>. Нават французы, якія першапачаткова разам з немцамі трымаліся насцярожаных пазіцыяў, урэшце пагадзіліся, што Еўропе патрэбная салідарнасць і супольнае фінансаванне».
Другі праект – «Шчыт Усход», спалучаны з ініцыятывай краінаў Балтыі пабудаваць лінію абароны Балтыйскага мора. Туск прадставіў на саміце гэты праект як сумесны з балтыйскімі краінамі.
«Тут таксама была падобная спрэчка, і нам удалося прасунуцца ў такіх жа маштабах», – адзначыў прэм’ер-міністр.
Напярэдадні саміту ЕЗ Польшча і краіны Балтыі звярнуліся да партнёраў з прапановай прыняць удзел у фінансаванні будаўніцтва абароннай лініі на мяжы з Беларуссю і Расеяй.
22 траўня міністр нацыянальнай абароны Польшчы Уладзіслаў Касіняк-Камыш прадставіў у Сейме справаздачу аб стане бяспекі краіны, у тым ліку расказаў падрабязней аб плане нацыянальнай абароны і стрымліванні пад назвай «Усходні шчыт». Ён выказаў гатоўнасць павялічыць «ваенную прысутнасць» на мяжы з Беларуссю і выдзеліць на гэтыя мэты дадатковае фінансаванне.
Намеснік міністра нацыянальнай абароны Цэзарый Томчык паведаміў, што першыя фінансавыя інвестыцыі ў развіццё абарончай інфраструктуры на мяжы плануюць выдзеліць у першым квартале 2025 года, і назваў гэты праект прыярытэтным для польскага ўраду.
Марыя Міхалевіч belsat.eu
