Менскі гарадскі суд 15 ліпеня пачне разглядаць крымінальную справу ў дачыненні фігурантак «справы TUT.by». Абвінавачваюцца рэдактарка Вольга Лойка, карэспандэнтка Алена Талкачова і юрысконсульт Кацярына Ткачэнка, усе яны па-за межамі Беларусі.
Адпаведная інфармацыя з’явілася ў раскладзе судовых паседжанняў на сайце Вярхоўнага Суда.
Былым палітзняволеным працаўніцам TUT.by выставілі абвінавачванне паводле чатырох артыкулаў Крымінальнага кодэксу:
- ч. 3 арт. 130 («Распальванне іншай сацыяльнай варожасці і варажнечы»),
- ч. 2 арт. 243 («Ухіленне ад выплаты падаткаў»),
- ч. 1 арт. 342 («Арганізацыя і рыхтаванне дзеянняў, якія груба парушаюць грамадскі парадак, альбо актыўны ўдзел у іх»),
- ч. 3 арт. 361 («Заклікі да захадаў абмежавальнага характару (санкцыяў), іншых дзеянняў, скіраваных на прычыненне шкоды нацыянальнай бяспецы Беларусі»).
Крымінальны пераслед супрацоўнікаў TUT.by спецслужбы распачалі ў траўні 2021 года. Пасля ператрусаў у галоўным офісе ў Менску, а таксама ў рэгіянальных філіялах былі затрыманыя 15 асобаў. З цягам часу большасць з іх адпусцілі і памілавалі.
Вользе Лойцы, Алене Талкачовай і Кацярыне Ткачэнцы змянілі меру стрымання, але абвінавачванняў з іх не знялі. Праз некаторы час экс-працаўніцы TUT.by з’ехалі за мяжу. У Беларусі іх абвесцілі ў вышук.
17 сакавіка 2023 года галоўную рэдактарку TUT.by Марыну Золатаву і генеральную дырэктарку Людмілу Чэкіну асудзілі на 12 гадоў калоніі. Рашэнне вынесла суддзя Валянціна Зянкевіч – яна ж цяпер будзе завочна судзіць Лойку, Талкачову і Ткачэнку.
Глеб Нержын belsat.eu
