Мікалай Лукашэнка вучыцца ў Пекінскім універсітэце на спецыяльнасці «біятэхналогіі». Сакратар партыйнага камітэту кітайскай ВНУ Хаў Пін заявіў тэлеканалу «Беларусь 1», што хлопец нікому не кажа, хто ягоны бацька.
Пра тое, што малодшы сын самаабвешчанага кіраўніка Беларусі цяпер вучыцца ў Пекінскім універсітэце, стала вядома год таму – пра гэта апавёў сам Аляксандр Лукашэнка. Факультэту і спецыялізацыі ён тады не назваў.
На гэтым тыдні, 25 чэрвеня, сакратар партыйнага камітэту Пекінскага ўніверсітэту Хаў Пін наведаў Менск і сустрэўся з Аляксандрам Лукашэнкам. Увечары 30 чэрвеня на тэлеканале «Беларусь 1» выйшаў сюжэт, у якім той адказаў на пытанне наконт Мікалая Лукашэнкі.
«Ён вельмі сціплы. Ён нікому не кажа, што ён сын прэзідэнта. Калі б пра гэта даведаліся, ці магчыма было ўвогуле вучыцца? Я за ім назіраў. Ён сапраўды вельмі добра вучыцца. Ён найлепшы студэнт на курсе. Вельмі ўдумлівы хлопец. І сціплы», – заявіў Хаў Пін у размове з беларускімі прапагандыстамі.
Паводле «Беларусь 1», Мікалай Лукашэнка вучыцца ў Пекіне па праграме абмену для «таленавітых студэнтаў-біятэхнолагаў». Зазначым, што раней, у 2022 годзе, паведамлялася, што Коля – студэнт біялагічнага факультэту БДУ.
У сюжэце «Беларусь 1» таксама паказалі кадры, дзе побач стаяць малодшы сын Лукашэнкі, кіраўнік МЗС РФ Сяргей Лаўроў (ён наведаў Менск 25 чэрвеня) і цяпер ужо былы міністр замежных справаў Беларусі Сяргей Алейнік. «Мікалай ужо асвоіў крышку [кітайскую мову]?» – пытаецца Алейнік. «Гэта доўгі працэс», – адказвае Мікалай.
Глеб Нержын belsat.eu
