Мэр Вільні Валдас Бенкунскас 2 ліпеня прадставіў план палітыкі па абароне літоўскай сталіцы. Пра гэта паведамляе Delfi.
«Вільня – сталіца, таму гэта мішэнь і мэта № 1. І, без усялякага сумневу, – мы знаходзімся побач з мяжой Беларусі. За некалькі дзясяткаў кіламетраў ад Вільні ёсць Астравецкая АЭС, якая зʼяўляецца пагрозай», – заявіў мэр Вільні Валдас Бенкунскас.
Паводле мэра, план па абароне гораду можна падзяліць на дзве часткі: дапамога абароне і ўмацаванне грамадзянскай абароны. Дапамога абароне ўключае парк захадаў па контрмабільнасці, новую прастору для дронаў, вайсковую камендатура і размяшчэнне нямецкай брыгады.
Улады разлічваюць, што восенню першая частка парку контрмабільнасці будзе завершаны – ён будзе арыентаваны на ўсходнюю і паўднёвую часткі гораду.
«Потым мэта на бліжэйшыя месяцы, можа, год – ахапіць і стварыць неабходную сетку мер для пакрыцця ўсяго гораду мерамі контрмабільнасці па ўсім перыметры», – сказаў Бенкунскас.
Плануецца купля бетонных блокаў для перакрыцця дарог, процітанкавых надолбаў (зубоў дракона), зборных камплектаў сталёвых «вожыкаў».
«Яны найперш патрэбныя для блакавання ўезду ў горад па дарогах. Асноўныя дарогі ў паўднёвым і ўсходнім напрамку, калі глядзець на вонкавую мяжу NATO. Гэта ахоплівае і сетку невялікіх дарог, пачынаючы з лясных, гравійных, якія маглі б выкарыстоўвацца падчас нападу на горад», – растлумачыў мэр.
Мапу дарог, якія заблакуюць у выпадку вайны, агалошваць не будуць.
Што да новай прасторы для дронаў, то, паводле мэра, першая такая траса зʼявіцца ўлетку сярод шэшкінскіх узгоркаў. Там пасля рэгістрацыі змогуць трэнавацца дзеці і дарослыя – гэта патрэбна, каб больш людзей валодалі адпаведнымі навыкамі.
Глеб Нержын belsat.eu
