«Тут магчымае кожнае рашэнне». Міністр унутраных справаў Польшчы – пра закрыццё мяжы з Беларуссю
Міністр унутраных справаў і адміністравання Польшчы Томаш Семоняк у інтэрв’ю «Polsat News» у сераду 3 ліпеня закрануў тэму імавернага закрыцця межаў з Беларуссю.
Паводле Семоняка, у справе намеру Польшчы закрыць усе памежныя пераходы з Беларуссю, «усё цяпер на стале»:
«Хочам убачыць, дзе інтарэсы Польшчы, а дзе можна ўдарыць па інтарэсах тых, хто шкодзіць Польшчы. Тут магчымае кожнае рашэнне. Я не буду рабіць заяваў. Мы працуем з міністрам замежных справаў, міністрам інфраструктуры, міністрам фінансаў пад кіраўніцтвам прэм’ера над рэакцыяй на дзеянні Беларусі, каб яна была паспяховай і эфектыўнай і каб не біла па польскіх інтарэсах».
Міністр адзначыў, што за апошнія тыдні колькасць спробаў незаконна перайсці беларуска-польскую мяжу мігрантамі скарацілася на 30–50 %. Паводле кіраўніка МУС, гэтаму магло паспрыяць увядзенне буфернай зоны на мяжы, а таксама размяшчэнне адмысловых паліцэйскіх падраздзяленняў:
«Але таксама нельга выключаць, што нацыянальнае свята ў Беларусі, якое выпадае на сёння [3 ліпеня. – Заўвага рэд.], прывяло да таго, што службы сканцэнтраваліся на іншых сферах. Няма ніякіх сумневаў: маштабы таго, што адбываецца на мяжы, рэгулююцца беларускімі спецслужбамі. У сувязі з гэтым зніжэнне спробаў сёння зусім не азначае, што гэтых спробаў заўтра ці праз два дні будзе больш ці менш».
Раней пра імавернае поўнае закрыццё польска-беларускай мяжы заявіў міністр замежных справаў Польшчы Радослаў Сікорскі. Пазней ён патлумачыў, што мяжа будзе закрытая толькі для грузавых перавозаў. У эфіры радыё «Zet» ранкам 3 ліпеня Сікорскі заявіў, што не выключае спынення пропуску грузаў на беларуска-польскай мяжы, але гаворка не пра закрыццё пераходаў для звычайных людзей – палякаў і беларусаў.
Цяпер на беларуска-польскай мяжы працуюць толькі два пункты пропуску: «Берасце – Тэрэспаль» для пасажыраў і «Казловічы – Кукурыкі» для грузавых машынаў. Таксама грузы ідуць чыгункаю.
Падчас візіту ў Пекін прэзідэнт Польшчы Анджэй Дуда закрануў пытанне сітуацыі на польска-беларускай мяжы. У прыватнасці пастараўся ўпэўніць Кітай паўплываць на рэжым Аляксандра Лукашэнкі, каб той спыніў міграцыйны крызіс. Дуда даў кітайскаму боку інфармацыю пра сітуацыю на мяжы Польшчы і Беларусі, праз якую праходзіць ключавы з пункту гледжання гандлю Кітаю чыгуначны маршрут у Еўропу. І які можа быць зачынены разам з іншымі памежнымі пунктамі пропуску з прычыны дзеянняў рэжыму Лукашэнкі.
Марыя Міхалевіч belsat.eu
