У Беларусі зноў збіраюцца ўрэгуляваць дзейнасць арганізатараў культурніцка-відовішчных імпрэзаў. Ім даюць месяц на тое, каб падаць дакументы на залучэнне ў спецыяльны рэестр, што дае права займацца арганізацыяй канцэртаў, святаў і шоу.
Паводле адпаведнай пастановы Савету Міністраў, якая была апублікаваная і ўступіла ў моц 19 верасня, каб трапіць у дзяржаўны рэестр, неабходна асноўным відам дзейнасці мець менавіта арганізацыю культурніцка-відовішчных імпрэзаў.
Стаж працы ў сферы арганізацыі такіх захадаў у арганізатараў, заснавальнікаў, кіраўнікоў і спецыялістаў, якія працуюць у арганізатара, мае быць не меншы за тры гады.
А ўласна імпрэзы маюць адпавядаць такім крытэрам, як эстэтычная каштоўнасць твораў, мастацкая цэласнасць і кампазіцыйная завершанасць, мастацкае афармленне і выканальніцкае майстэрства ўдзельнікаў.
Пацвердзіць стаж для залучэння ў рэестр неабходна шляхам надання копіяў працоўных кніжак, даведак, копіяў дамоваў. Таксама складальнікі пастанаўлення патрабуюць інфармацыю пра імпрэзы (відэа- або аўдыязапісы, сцэнары ды інш.), якія праводзіліся цягам трох папярэдніх гадоў.
Сярод патрабаванняў таксама ёсць выпіска аб правапарушэннях з адзінага дзяржаўнага банку звестак аб правапарушэннях у адносінах да арганізатара (ІП), заснавальнікаў, кіраўнікоў арганізатара (для юрыдычных асобаў).
Пры гэтым дзеянне пастановы датычыць усіх арганізатараў культурніцка-відовішчных імпрэзаў, нават тых, хто ўжо быў залучаны ў рэестр раней. У выпадку ненадання неабходных дакументаў пра пацвярджэнне стажу і падобнага яны будуць выключаныя з рэестру.
Раман Шавель belsat.eu
