Парламенцкая асамблея АБСЕ прыняла рэзалюцыю па прызнанні дзеянняў Расеі генацыдам украінскага народу і неабходнасцю дэкаланізацыі РФ. Пра гэта паведаміў член парламенцкай дэлегацыі Павел Фралоў у Telegram.
«У дзень адкрыцця летняй сесіі ў Бухарэсце ПА АБСЕ прыняла рэзалюцыю з асуджэннем 10-гадовай узброенай агрэсіі РФ супраць Украіны, якая прызнала дзеянні ваенна-палітычнага кіраўніцтва РФ і яе ўзброеных сіл падчас поўнамаштабнага ўварвання генацыдам украінскага народу», – заявіў ён.
Павел Фралоў падкрэсліў, што рэзалюцыя вызначае дэкаланізацыю Расеі «неабходнай умовай для ўстанаўлення моцнага міру».
Галоўныя тэзісы рэзалюцыі:
- заклік усіх 53 краін-удзельніц АБСЕ прыкладаць намаганні для дэакупацыі Крыму і ўсіх акупаваных тэрыторый Украіны шляхам падтрымкі Формулы міру і Крымскай платформы;
- заклік дзяржаў АБСЕ стварыць Спецыяльны трыбунал для прыцягнення да адказнасці Расеі за злачынствы, учыненыя ў ходзе агрэсіўнай вайны супраць Украіны, правесці на міжнародным і нацыянальным узроўнях расследаванне масавых зверстваў, забойстваў, катаванняў, згвалтаванняў арміяй РФ;
- падкрэсліваецца неабходнасць хуткага запуску механізму выкарыстання замарожаных расейскіх актываў на карысць Украіны, краінам АБСЕ прапануецца далучацца да Пагаднення аб Міжнародным Рэестры страт, прычыненых Украіне агрэсіяй РФ;
- прэзідэнцкія выбары 2024 года ў РФ прызнаюцца падтасаванымі і такімі, якія падрываюць легітымнасць усёй выбарчай сістэмы РФ;
- падтрымка стварэння Міжнароднай кааліцыі па вяртанні ўкраінскіх дзяцей, а таксама забеспячэнне вызвалення ўкраінскіх ваеннапалонных і грамадзянскіх асоб;
- заклік забараніць імпарт расейскага звадкаванага газу ў Еўразвяз, рээкспарт і транзіт праз парты ЕЗ.
Сесія Парламенцкай асамблеі АБСЕ працягнецца да 3 ліпеня.
Нагадаем, Міжнародны суд ААН у Гаазе прызнаў сваю юрысдыкцыю па справе Украіны супраць Расеі па генацыдзе. 44 краіны падтрымалі ідэю стварыць спецтрыбунал па злачынстве агрэсіі Расеі і выкарыстоўваць яе замарожаныя актывы на карысць Украіны.
Ася Саковіч belsat.eu
