Украіна дамаглася вызвалення пяці сваіх грамадзян, якія былі асуджаныя ў Беларусі па палітычных матывах. Цяпер усе яны знаходзяцца ва Украіне. Пра гэта распавёў Уладзімір Зяленскі.
На волі апынуліся Наталля Захаранка, Павел Купрыенка, Людміла Ганчарэнка, Кацярына Бруханава і фігурант справы за падрыў расейскага самалёту А-50 у Мачулішчах Мікалай Швец. Усяго Украіна паведаміла пра вяртанне 10 чалавек, астатнія – з расейскага палону.
«Пяцёра цывільных, якія былі захопленыя на тэрыторыі Беларусі і пазбаўленыя волі: Мікалай Швец, Наталля Захаранка, Павел Купрыенка, Людміла Ганчарэнка і Кацярына Бруханава. Усе яны ўжо вызваленыя і ўдома – ва Украіне… Хачу адзначыць таксама намаганні Ватыкана дзеля таго, каб вярнуць дадому гэтых людзей», – напісаў Уладзімір Зяленскі.
Паводле звестак «Белсату», гэта можа быць звязана з нядаўнім вяртаннем з украінскай турмы беларуса Андрэя Герыловіча. Ён ваяваў у складзе ПВК «Вагнер» і быў асуджаны ва Украіне на 9 гадоў зняволення. Ён быў перададзены Расеі ў рамках абмену ваеннапалоннымі. Пра гэта стала вядома 25 чэрвеня.
Таксама 23 чэрвеня быў заўважаны ў Менску асуджаны ва Украіне мітрапаліт Ёнафан (Анатоль Ялецкіх). Улетку 2023 года яго пакаралі 5 гадамі пазбаўленне волі за апраўданне расейскай агрэсіі. У Менску Анатоль Ялецкіх быў на набажэнстве ў Свята-Духавым кафедральным саборы разам з мітрапалітам Веніямінам.
Яшчэ адно супадзенне ў вызваленнях – сярод 10 вызваленых украінцаў на волі апынуліся два святары Багдан Гелета і Іван Лявіцкі. Гэта святары Украінскай Грэка-Каталіцкай Царквы, якія былі захопленыя ў Бярдзянску за супраціў расейскім войскам.
Хто і за што быў пакараны ў Беларусі?
Наталля Захаранка – прадпрымальніца. На пачатку ліпеня 2023 году яна знікла па дарозе ў Мазыр, дзе жыве яе сястра. Яе нумары і кантакты пасля перасячэння польска-беларускай мяжы сталі недасяжныя, а афіцыйныя органы маўчалі. Высвятлілася, што яе затрымалі і абвінавацілі ў шпіянажы на карысць Украіны. Суддзя Анатоль Сотнікаў пакараў яе 9 гадамі пазбаўлення волі.
Паўла Купрыенку ў сакавіку 2023 года пакаралі нібыта за агентурную дзейнасць 7 гадамі калоніі ва ўмовах узмоцненага рэжыму. Прысуд вынес суддзя Руслан Царук.
Людмілу Ганчарэнка таксама пакаралі нібыта за агентурную дзейнасць у снежні 2023 года. Справу ў закрытым рэжыме разгледзеў суддзя Яўген Шаршнёў. Беларускім праваабаронцам дакладны прысуд невядомы.
Кацярына Бруханава з 2016 года жыла ў Беларусі і працавала перакладчыцай з кітайскай мовы. Яе затрымалі, калі яна праходзіла беларускую мяжу. Паводле праваабаронцаў «Вясны», у яе запатрабавалі даць на праверку тэлефон, і яна дала яго супрацоўнікам разам з паролямі. Беларускія сілавікі знайшлі, што 30 сакавіка 2022 года яна адправіла два відэа ў чат-бот рэдакцыі «Зеркало». На відэа было перамяшчэнне расейскай ваеннай тэхнікі пад Менскам, якое яна сама зняла.
Яе абвінавацілі ў «садзейнічанні экстрэмісцкай дзейнасці» і пакаралі 2,5 гадамі калоніі. Прысуд вынес суддзя Андрэй Сіз у кастрычніку 2023 года.
Мікалай Швец апынуўся пад вартай у Беларусі пасля дыверсіі ў Мачулішчах, калі быў пашкоджаны расейскі самалёт А-50. Паводле беларускіх прапагандыстаў, Мікалая ў Беларусь нібыта адправілі ўкраінскія спецслужбы, каб зладзіць тэракт.
Арсен Рудэнка belsat.eu
