Мінінфарм чытае пра сябе і дзяржСМІ ў незалежных медыя. Справаздачу выпадкова апублікавалі
Міністэрства інфармацыі размясціла ў сябе на сайце агляд кантэнту незалежных СМІ з «экстрэмісцкімі» спасылкамі. Гэты дакумент з’явіўся замест Рэспубліканскага спісу экстрэмісцкіх матэрыялаў, а праваабаронцы «Вясны» паспелі яго спампаваць.
Дакумент, які выпадкова выцек у сетку, Мінінфарм называе «аналізам асвятлення дзейнасці дзяржаўных сродкаў масавай інфармацыі Беларусі недзяржаўнымі СМІ». Ён датаваны 24 чэрвеня.
Міністэрства з дапамогай пошукавай сістэмы «INTERSCAN» сочыць, якія тэмы асвятляюць незалежныя СМІ. Прычым у справаздачы іх не называюць «экстрэмісцкімі», а «апазіцыйнымі» і «недзяржаўнымі».
Усяго дакумент змяшчае сем старонак. Там цытуюцца пяць тэкстаў: «Услед за Лукашэнкам на беларусаў, якія “не працуюць на максімуме”, паскардзіўся і прапагандыст АНТ» («Зеркало»), «Беларусы па абодва бакі мяжы. Узаемныя прэтэнзіі гуляюць на руку прапагандзе» («Media IQ»), «”Не па душы людзям смецце выкідваць цывілізавана”: берасцейскія прапагандысты абвінавацілі ў стыхійных звалках саміх жыхароў» («BG.Media»), «Ад “можам абараніць” да “можам паўтарыць” – адзін крок. Як змяніўся мілітарысцкі наратыў у Беларусі» («Media IQ») і «Марат Маркаў: дзяржСМІ вызваліліся ад людзей з “ідэалагічнай разгубленасцю”» («Наша Ніва»).
Таксама Мінінфарму цікава, што пішуць пра яго самога і дзяржаўных СМІ і прапагандыстаў. Для гэтага манітораць тэмы па запытах «СМІ», «сродкі масавай інфармацыі», «Маркаў», «Андрэй Кунцэвіч», «прапагандыст», «журналіст», «ідэолаг», «ідэалогія», «Пул», «клуб рэдактараў», «Мінінфарм», «Мінінфарм Беларусі», «Міністэрства інфармацыі», «Міністэрства праўды», «раённыя газеты», «раёнка», «Лебедзева», «Азаронак», «Пуставы», «Тур».
Фота вокладкі: Белсат
Арсен Рудэнка belsat.eu
