«Белсат» працягвае распавядаць пра выпадкі рэпрэсіяў, якія чыніць рэжым Аляксандра Лукашэнкі супраць беларускага грамадства.
Камітэт дзяржаўнай бяспекі 16 лютага паведаміў пра затрыманне грамадзянаў Украіны і Беларусі ў выніку так званай «чэкісцкай ваеннай аперацыі» ў Лельчыцкім раёне. Улады сцвярджаюць, што яны нібыта злавілі «дыверсантаў», якія дзейнічалі па загадзе СБУ, і планавалі ўчыніць выбухі ў Расеі і Беларусі. Сярод затрыманых – грамадзяне Украіны Сяргей і Павел Кабарчукі, а таксама грамадзянін Беларусі, жыхар Берасця Віталь Уласюк. Супраць іх распачатыя крымінальныя справы па арт.13 і арт.289 («Падрыхтоўка да акту тэрарызму»), арт.358-1 («Агентурная дзейнасць») КК.
Паводле Праваабарончага цэнтру «Вясна», у Докшыцах затрымалі былога настаўніка гісторыі Арцёма Стадольніка. Яго абвінавачваюць паводле арт. 24.23 КаАП («Несанкцыянаванае пікетаванне») за допіс у інстаграме ад 18 студзеня 2021 году. Ён не мае палітычнага зместу, але быў праілюстраваны здымкам машыны з налепкай «Пагоні». Налепку Арцём зняў пазней па патрабаванні міліцыянтаў: тады абышлося без пратакола. Цяпер Стадольніка затрымалі на трое содняў.
ПЦ «Вясна» паведамляе пра рэйды сілавікоў у Жлобіне і на Магілёўшчыне.
У Магілёўскай вобласці як мінімум некалькі чалавек былі затрыманыя КДБ. Сілавікоў цікавілі дзеянні пасля выбараў 2020 года, а таксама перапіскі ў мэсэнджарах і сацсетках, падпіскі на Telegram-каналы. У некаторых выпадках, людзей прымушалі адпісвацца ад іх, нават тых, якія не ўключаны ў спіс «экстрэмісцкіх матэрыялаў», а проста не спадабаліся чэкістам. Акрамя таго, супрацоўнікі КДБ цікавіліся, ці збіраецца той ці іншы чалавек ісці на выбары. Пасля размовы людзей прасілі падпісаць дакумент, у якім яны дэкларавалі недапушчальнасць незаконных дзеянняў, пасля чаго адпускалі.
У Жлобіне 15 лютага было разгледжана пяць адміністратыўных справаў. Былых палітвязняў Андрэя Андрэева, Дзмітрыя Бераснева, Аляксандра Кісялева, Мікалая Ільянка і Яўгена Пархамовіча прыцягнулі да адказнасці па артыкуле 24.3 КаАП («Непадпарадкаванне супрацоўніку міліцыі»). Праваабаронцы мяркуюць, што гэта была «зачыстка ненадзейных» напярэдадні выбараў.
У Менску затрымалі лідара зліквідаванай партыі «Зялёныя» Дзмітрыя Кучука. Ён збіраўся ўскласці кветкі каля амбасады Расеі ў Менску, каб ушанаваць памяць Аляксея Навальнага. Вядома, што пасля затрымання яго адвезлі ў Цэнтральны РУУС Менску.
Следчы камітэт заявіў, што супраць Франака Вячоркі, якія зʼяўляецца старэйшым дарадцам абранай прэзідэнткі Беларусі Святланы Ціханоўскай, распачатае спецыяльнае вядзенне. Яму выстаўлена абвінавачанне адразу па 9 артыкулах Крымінальнага кодэксу.
Менгарсуд 16 лютага агучыў прысуд ганаровай выпускніцы БДУ 27-гадовай Ксеніі Ходыравай: 5 гадоў калоніі агульнага рэжыму. Палітзняволеную прызналі вінаватай у «фінансаванні экстрэмісцкага фармавання» (арт. 361-2 КК) і «фінансаванні ўдзелу ва ўзброеным фармаванні на тэрыторыі замежнай дзяржавы » (ч. 2 арт. 361-3 КК).
Сілавікі наведваюць сябраў зліквідаванай Беларускай сацыял-дэмакратычнай партыі (Грамада), якія прымалі раней удзел у назіранні за выбарамі. Праводзяцца прэвентыўныя гутаркі, праглядаюцца тэлефоны, некаторых затрымліваюць, паведамляе Telegram-канал БСДП.
У Берасці за данаты затрыманы мужчына, супраць яго распачатая крымінальная справа. «Пакаяльнае відэа» з затрыманым апублікавалі праўладныя тэлеграм-каналы.
Старшыня Следчага камітэту Дзмітрый Гора заявіў, што ў 2023 годзе ў пракуратуру для накіравання ў суд было перададзена больш за 1300 «экстрэмісцкіх» справаў (нагадаем, слова «экстрэмізм» прадстаўнікі рэжыму Лукашэнкі выкарыстоўваюць для абазначэння любых праяваў іншадумства). Акрамя таго, ён распавёў, што ў Беларусі «рэалізуецца механізм вызвалення ад крымінальнай адказнасці асобаў, якія ажыццявілі фінансаванне экстрэмісцкай дзейнасці, аднак з’явіліся з пакаяннем і кампенсавалі прычыненую шкоду». Паводле старшыні СК, сума выплачаных у 2023 годзе «дабрачынных ахвяраванняў» ужо перавысіла Br 37 млн – гэта каля $ 11,5 млн.
Глеб Нержын belsat.eu