У Вільні і Беластоку беларусы ўвечары 11 ліпеня правялі акцыі памяці палітвязня і мастака Алеся Пушкіна, які ноччу памёр у рэанімацыі Гарадзенскай больніцы хуткай медычнай дапамогі. Як перадаюць карэспандэнты «Белсату», удзельнікі акцый выстраіліся насупраць амбасады Беларусі ў Літве і Генеральнага консульства Беларусі ў Беластоку.
Вядома, што Алесь знаходзіўся ў турме №1 у Горадні, адкуль ноччу 11 ліпеня быў дастаўлены па «хуткай» непрытомным у шпіталь. Там яму рабілі аперацыю, але сэрца мастака спынілася. Пушкіну было 57 гадоў, у яго чацвёра дзяцей.
Удзельнікі акцыі ў Вільні разам з Алесям Пушкіным згадвалі іншых ахвяраў рэжыму. Ля плоту дыпламатычнага прадстаўніцтва ў сталіцы Літвы ўзнік стыхійны мемарыял.
У Беластоку ўвечары 11 ліпеня беларусы сабраліся на акцыю ў памяць Алеся Пушкіна ў скверы Вольнай Беларусі: так цяпер завецца пляцоўка перад Генеральным консульствам Беларусі ў Беластоку. У руках людзей былі як партрэты Алеся Пушкіна, так плакаты з партрэтамі беларусаў, раней загінулых у няволі, у тым ліку Вітольда Ашурка. Нядаўна, 21 траўня тут збіраліся на акцыю ў памяць аб ім.
«Не забудзем, не даруем», – гукала з паўсотні чалавек пад консульствам.
Антон Тачняк belsat.eu
