Суд Заводскага раёну Менску 2 лістапада прыгаварыў керамістку Наталлю Карнееву да 3 гадоў «хатняй хіміі» па артыкуле аб грубым парушэнні грамадскага парадку (ч.1 арт. 342 КК), паведамляюць праваабаронцы. Суд адбыўся за адзін дзень.
Пасля абвяшчэння прысуду Наталлю Карнееву вызвалілі ў зале суда. Справу разглядала суддзя Жанна Хвайніцкая.
Таксама Карнеевай выставілі грамадзянскі пазоў. Пытанне аб яго памеры разгледзяць у грамадзянскай вытворчасці.
44-гадовая Наталля Карнеева была затрыманая разам з мужам 19 жніўня. У верасні мужа керамісткі адпусцілі, але яе саму ўзялі пад варту па крымінальнай справе. Следства сцвярджае, што Карнеева ўдзельнічала ў пратэстных маршах 30 жніўня і 18 кастрычніка 2020 года.
У Наталлі дзве дачкі, адна з якіх – няпоўнагадовая. На некаторы час дзяўчынку пасля затрымання дарослых адправілі ў дзіцячы прытулак, нібыта «праз антысанітарныя ўмовы пражывання і поўнай адсутнасці якога-небудзь выхавання». Вядома, што апеку над дачкой Наталлі афармляла сваячка.
Наталля – мастачка, керамістка, педагог з 13-гадовым досведам. Яна ладзіла майстар-класы па лепцы з гліны.
Алена Рувіна belsat.eu