Прэзідэнт Францыі Эманюэль Макрон у інтэрв’ю TF1 і «France 2» заявіў, што Украіне перададуць знішчальнікі «Mirage 2000-5».
Прэзідэнт Францыі Эманюэль Макрон зазначыў, што знішчальнікі «Mirage 2000-5» дапамогуць Украіне абараніць сваю зямлю і паветраную прастору. Колькі самалётаў плануецца перадаць ЗСУ, кіраўнік дзяржавы не ўдакладніў.
Макрон таксама паведаміў, што ўлетку ўкраінскія пілоты маюць прайсці навучанне на «Mirage 2000-5». Поўны курс навучання зойме 5-6 месяцаў.
Ён таксама заявіў пра намер падрыхтаваць 4,5 тысячы ўкраінскіх вайскоўцаў, экіпаваць іх і забяспечыць боепрыпасамі, каб яны маглі абараняць сваю зямлю.
«Mirage 2000» – французскі шматмэтавы знішчальнік чацвёртага пакалення, распрацаваны ў 1970-х гадах. Здольны несці ракеты SCALP («Storm Shadow») і кіраваныя авіябомбы. Асноўны баявы самалёт ВПС Францыі ў канцы XX – пачатку XXI стагоддзя. З 2000-х у французскай арміі яго пачаў замяняць больш сучасны знішчальнік «Rafale». «Mirage 2000» ёсць на ўзбраенні некалькіх краінаў Азіі, Еўропы і Лацінскай Амерыкі.
Глеб Нержын belsat.eu
