Ліцэю БДУ надалі імя арганізатара чырвонага тэрору Фелікса Дзяржынскага. Адпаведны ўказ падпісала кіраўніцтва БДУ, паведамляе ліцэй у сваім тэлеграм-канале.
Ініцыятаркаю надаць ліцэю імя Дзяржынскага была цяперашняя дырэктарка ўстановы Таццяна Мамчыц.
«Выказваем падзяку Міністэрству адукацыі і Беларускаму дзяржаўнаму ўніверсітэту за падтрымку ініцыятывы калектыву Ліцэю», – піша ў тэлеграм-канале ліцэй.
З просьбай перайменаваць ліцэй такім чынам звярнуліся працаўнікі ўстановы, аднак гэта адбылося пад прымусам, паведамляе «Еўрарадыё» са спасылкай на свае крыніцы.
Апошнім часам ліцэй БДУ супрацоўнічае з КДБ: вучняў адпраўляюць на вучэнні на вайсковыя палігоны, ва ўстанове стварылі «вайскова-патрыятычны» клуб.
Фелікс Дзяржынскі – заснавальнік ВЧК, Усерасейскай надзвычайнай камісіі для барацьбы з контррэвалюцыяй і сабатажам (рас. Всеросийская черезвычайная комиссия по борьбе с контрреволюцией и саботажем) – гэта папярэдніца НКВД, КГБ і іншых савецкіх спецслужбаў.
«Мы ёсць арганізаваным тэрорам», – апісваў Дзяржынскі сваю дзейнасць.
Ён нарадзіўся ў Беларусі, у маёнтку Дзяржынава каля мястэчка Івянец Менскай вобласці. Тэлеграм-канал ліцэю называе Дзяржынскага «выбітным выхадцам беларускай зямлі».
Арсен Рудэнка belsat.eu
