Дзяржаўны тэлеканал СТВ, што атрымаў права на трансляцыю ўсіх матчаў чэмпіянату Еўропы па футболе, працягвае палітыку ігнаравання зборнай Украіны.
26 чэрвеня ў трэцім туры групавога этапу зборная Украіны згуляе з Бельгіяй. Гэты матч будзе вызначальным для абедзвюх камандаў, але, як вынікае з анонсу СТВ, гульню дзяржаўнае тэлебачанне не пакажа.
«Найбольш заблытаная сітуацыя ў чацвёрцы E. Усе каманды маюць аднолькавую колькасць балаў. А таму ў плэй-оф можа трапіць кожны. Крыху больш шанцаў у бельгійцаў і каманды Румыніі. Яны абыходзяць супернікаў паводле дадатковых паказнікаў», – распавялі ў анонсе СТВ.
Такім чынам, дзяржаўнае тэлебачанне працягвае палітыку поўнага ігнаравання зборнай Украіны: гульняў каманды не толькі не паказваюць, але нават не згадваюць пра яе існаванне на турніры.
Нагадаем, што дзяржаўны тэлеканал СТВ за некалькі дзён да старту «Еўра-2024» стаўся афіцыйным партнёрам УЕФА ў трансляцыі чэмпіянату. На СТВ абяцалі паказаць усе матчы ў жывым эфіры. Аднак замест першай і другой гульняў Украіны на «Еўра-2024» у эфір дзяржаўнага тэлебачання пускалі расейскія серыялы.
Глеб Нержын belsat.eu
