Міністэрства замежных справаў адрэагавала на заяву Лукашэнкі пра габрэяў-карупцыянераў, назваўшы ягоныя словы «выразна антысеміцкімі». Ведамства адзначыла, што гэта недапушчальна, піша выданне ynetnews.com.
Самаабвешчаны кіраўнік Беларусі на антыкарупцыйнай нарадзе заявіў, што ён не антысеміт, і пры гэтым адзначыў, што ў справе інспектара ў Віцебскай вобласці Ігара Брыло – «больш за палову габрэяў». «Яны што, у нас асаблівае, прывілеяванае становішча займаюць, што яны крадуць і не думаюць пра сваю будучыню?» – сказаў Лукашэнка.
У МЗС Ізраілю назвалі гэтыя словы «недапушчальнымі і абуральнымі», бо яны гучаць як «выразныя антысеміцкія каментары». Акрамя таго, беларускаму амбасадару ў Ізраілі «выказалі пратэст» з увагі на заяву Лукашэнкі.
Абраная прэзідэнтка Беларусі Святлана Ціханоўская, каментуючы антысеміцкі выпад Лукашэнкі, заявіла, што сапраўдная крыніца карупцыі – ягоны рэжым, а не габрэі. «Такая ненавісніцкая рыторыка небяспечна і мусіць быць выразна асуджаная», – напісала Ціханоўская ў сваім акаўнце ў X.com.
Раней выданне kan.org.il згадала, як палітык неаднаразова крытычна выказваўся пра габрэяў. Напрыклад, у 2007 годзе ён заявіў, што габрэі ператварылі Бабруйск у свінарнік, у ліпені 2021 года заявіў, што «увесь свет кланяецца» габрэям, а сёлета падчас падзеяў з нагоды заканчэння Другой сусветнай вайны Лукашэнка не згадаў пра Галакост.
«Лукашэнка стараецца падкрэсліць, што ён «не антысеміт», але ягоныя словы зноў і зноў даказваюць адваротнае», – падсумавалі журналісты.
Сцяпан Кубік belsat.eu
