Працаўнікі Камітэту дзяржкантролю праверылі выдаткаванне бюджэтных сродкаў на вытворчасць фільмаў і выявілі парушэнні. Падазраваным аказаўся Павел Латушка, які ў 2012 годзе працаваў на пасадзе міністра культуры, паведамляе прэсавая служба ДФР.
Дэпартамент фінансавых расследаванняў Камітэту дзяржаўнага кантролю распачаў крымінальную справу супраць Паўла Латушкі. Сілавікі паведамляюць, што нібыта выявілі прыкметы складу злачынства, прадугледжанага ч. 3 арт. 430 КК («Атрыманне хабару»).
Следчыя сцвярджаюць, што нібыта адзін з кіраўнікоў беларускай кампаніі, якая займаецца вытворчасцю кіна- і відэапрадукцыі, прыйшоў з павіннай і распавёў, што перадаў хабар Паўлу Латушку памерам 10 тысяч долараў. Дзякуючы гэтым сродкам ягоныя праекты ўлучылі ў план фінансавання вытворчасці фільмаў.
Раней Генеральная пракуратура Беларусі распачала крымінальную справу супраць Паўла Латушкі. Палітыка вінавацяць паводле ч. 3 арт. 426 КК («Учыненне злачынства супраць інтарэсаў службы»). Агулам цяпер супраць палітыка ў Беларусі завялі сем крымінальных справаў.
СВ belsat.eu
