Аляксандр Лукашэнка 7 снежня падпісаў указ № 480, у адпаведнасці з якім у беларускае грамадзянства прыняты 448 грамадзян Украіны, паведамілі ў прэс-службе Лукашэнкі.
Асобы, якія атрымалі грамадзянства, звярнуліся па гэтым пытанні пасля адпаведных даручэнняў, якія былі дадзены падчас «Вялікай размовы». Тады Лукашэнка даручыў да канца года разабрацца з сістэмай давання грамадзянства перасяленцам з Украіны, якія з-за ваенных дзеянняў на ўсходзе краіны вымушаны былі яе пакінуць.
Раней ужо быў падпісаны аналагічны ўказ, паводле якога ў грамадзянства Беларусі прыняты 248 грамадзян Украіны.
У цэлым пасля «Вялікай размовы» каля 1,2 тысяч чалавек, якія прыбылі з Украіны, сталі беларускімі грамадзянамі. Паведамляецца, што цяпер у Камісіі па пытаннях грамадзянства няма неразгледжаных заяў аб прыёме ў грамадзянства.
АД, belsat.eu