Акруговы суд Варшавы выдаў еўрапейскі ордар на арышт Томаша Шмыта, якога падазраюць у шпіянажы ў Польшчы, піша PAP са спасылкай на нацыянальную пракуратуру Польшчы.
Томаш Шмыт 6 траўня на прэс-канферэнцыі ў Менску заявіў, што просіць палітычнага прытулку ў Беларусі, паколькі пераследуецца па палітычных матывах у Польшчы.
Шмыт і яго жонка замяшаныя ў скандале, які звязаны з ціскам на суддзяў, якія выступалі супраць судовай рэформы ў Польшчы.
Томаш Шмыт быў суддзёй, які займаўся «таемнымі справамі», да якіх доступ маюць толькі прадстаўнікі спецслужбаў і суддзі.
Пасля таго, як у Беларусі Шмыт стаў здымацца ў прапагандысцкіх сюжэтах расейскага і беларускага тэлебачання, Польшча прызнала, што ён такім чынам наносіць шкоду польскай дзяржаве і ўдзельнічае ў гібрыднай вайне супраць яе.
Таксама Шмыт напісаў заяву ў Генпракуратуру Польшчы і Нацыянальнага пракурора Польшчы з просьбай распачаць крымінальную справу супраць кіраўніка польскага МЗС Радаслава Сікорскага.
«Міністр замежных спраў Польшчы Радаслаў Сікорскі ў польскіх СМІ не раз называў мяне здраднікам. Я не здраднік, няма такога артыкула, мяне не асудзілі за здраду. Афіцыйная асоба, такая, як міністр, не мае права выказваць без суда і следства такое меркаванне. І такія ўчынкі ў адпаведнасці з польскім законам падлягаюць пакаранню», – заявіў Томаш Шміт.
Раней Інтэрпол адмовіўся прысвойваць Томашу Шміту «чырвоную картку» вышуку, паколькі арганізацыя не дазваляе апрацоўваць па сваіх каналах дадзеныя аб дзеяннях супраць бяспекі дзяржавы, якія з’яўляюцца палітычнымі злачынствамі.
Арсен Рудэнка belsat.eu
