Амбасадар РФ у Менску Барыс Грызлоў заявіў пра намер пашыраць чыгуначнае і авіяспалучэнне паміж Расеяй і Беларуссю.
Амбасадар РФ Барыс Грызлоў паведаміў, што многія праекты, якія цяпер рэалізуюць Беларусь і Расея, звязаныя з транспартнай лагістыкай. Гэтак, літаральна днямі быў запушчаны цягнік паміж Псковам і Беларуссю.
«Станцыі будуць паступова прасоўвацца ўглыб Беларусі. Цяпер мы працуем над тым, каб былі чыгуначныя зносіны Смаленск – Ворша і Смаленск – Віцебск. Гэта таксама будзе рэалізаванае сёлета», – цытуе дыпламата БелТА.
Яшчэ адзін «цікавы праект» – гэта высакахуткасная чыгуначная магістраль Масква – Менск.
«Цягнік будзе дасягаць сталіц дзвюх краінаў на працягу прыкладна трох гадзінаў. Гэта цудоўны праект, і ён таксама будзе зрэалізаваны», – патлумачыў Барыс Грызлоў.
Акрамя таго, дыпламат нагадаў, што многія расейскія рэгіёны арганізавалі прамыя авіязносіны з беларускай сталіцай, і іх колькасць будзе расці.
Глеб Нержын belsat.eu