Амбасадар Беларусі ва Украіне Ігар Сокал заявіў, што пазіцыя Аляксандра Лукашэнкі па статусе анексаванага Расеяй Крыму залежыць ад ягоных стасункаў Лукашэнкі з украінскімі ўладамі. Пра гэта ён сказаў у эфіры тэлеканалу «НАШ».
Паводле яго, пазіцыя Лукашэнкі «будзе залежаць ад пазіцыі Украіны».
«Мы бачым, што Украіна за апошнія паўтара года цалкам радыкалізавалася ў дачыненні да Рэспублікі Беларусь, таму ўсе наступныя дзеянні прэзідэнта (…) будуць з’яўляцца крокамі ў адказ на дзеянні ўкраінскай улады», – заявіў Сокал.
Пры гэтым, паводле яго, Беларусь «ніколі не ставіла пад сумнеў тэрытарыяльную цэласнасць і суверэнітэт Украіны, але трэба зыходзіць з рэальнай палітыкі».
«Прызнае Аляксандр Рыгоравіч або не прызнае, паедзе ён туды або не паедзе – гэта залежыць толькі ад дзеянняў украінскай улады», – падкрэсліў дыпламат.
Нагадаем, што 4 лістапада беларускі дэпутат Андрэй Савіных заявіў, што Беларусь фактычна прызнала Крым расейскім. Украіна ў сваю чаргу назірае за выказваннямі беларускіх чыноўнікаў у справе прыналежнасці Крыма. Кіеў пры гэтым пагражае афіцыйнаму Менску санкцыямі, калі той прызнае Крым расейскім.
Пасля і сам Аляксандр Лукашэнка ў інтэрв’ю расейскаму прапагандысту Дзмітрыю Кісялёву 30 лістапада прызнаў акупаваны Расеяй украінскі Крым «дэ-факта і дэ-юрэ» расейскім і расказаў, што збіраецца прыехаць у Крым, а таксама заявіў, што прапаноўвае Пуціну вярнуць у Беларусь ядравую зброю.
Але пакуль у Крым прыехалі толькі пяцёра праўладных экспертаў, якія не маюць у Беларусі афіцыйнага статусу.
МГ belsat.eu
