Група народных дэпутатаў Украіны зарэгістравала ў Вярхоўнай Радзе праект пастановы аб прызнанні Беларусі краінай-агрэсарам, а таксама заклікала разарваць з Беларуссю дыпламатычныя зносіны, паведаміў у сваім тэлеграм-канале народны дэпутат Яраслаў Юрчышын.
Паводле Юрчышына, Беларусь павінна адказваць за поўнамаштабную вайну, паколькі прадставіла сваю тэрыторыю для здзяйснення агрэсіі супраць Украіны. Дэпутат нагадаў, што валанцёры неаднаразова заклікалі ўкраінскі парламент прызнаць Беларусь краінай-агрэсарам. Гэты крок у тым ліку патрэбны для будучага прыцягнення беларускага рэжыму да адказнасці і выплаты Беларуссю рэпарацыяў Украіне.
«Мы памятаем пра дапамогу беларусаў у вайне супраць расейскай навалы і ўдзячныя байцам Палка Каліноўскага. Аднак Беларусь як краіна павінна несці юрыдычную адказнасць за злачынствы, учыненыя на нашай тэрыторыі. Зрэшты, у свядомасці грамадства Беларусь Лукашэнкі ўжо даўно агрэсар. Трэба даказаць гэта і ў прававым полі. Каб свет не сумняваўся, уводзячы санкцыі», – зазначыў Юрчышын.
Праект пастановы быў зарэгістраваны ў Вярхоўнай Радзе 16 чэрвеня. У паясняльнай запісцы да яго гаворыцца, што ўкраінскі парламент прызнае Беларусь дзяржавай-агрэсарам і заклікае ўрады іншых краін і міжнародныя арганізацыі зрабіць тое ж самае.
Акрамя таго, Рада будзе заклікаць урад «неадкладна апрацаваць пытанні разрыву дыпламатычных зносінаў паміж Украінай і Рэспублікай Беларусь», а таксама звернецца да міжнароднай супольнасці з заклікам узмацнення санкцыйнага ціску на Менск і прыцягнення да адказнасці ваенных злачынцаў.
Марыя Міхалевіч belsat.eu
