У Беларусі пачасціліся выпадкі захворвання кароў на інфекцыю, што перадаецца людзям. Пра гэта паведамляе «BYPOL» са спасылкаю на свае крыніцы.
Найбольш верагодна, гаворка пра бруцэлёз, адзначае «BYPOL». Гэта заанозная інфекцыя, якая перадаецца ад хворых жывёлінаў чалавеку і характарызуецца множным паражэннем органаў і сістэмаў арганізму чалавека. Такая інфекцыя патрабуе доўгага лекавання, а пасля і рэабілітацыі.
«Асяродак захворвання месціцца ў прымежных да Беларусі раёнах Смаленскай вобласці: Хіславіцкім і Маныстыршчынскім, дзе ў звязку з гэтым зрабілі ўзмоцненыя захады бяспекі. Абавязкова ўсе здабытыя тушы жывёлінаў маюць правярацца ў лабараторыі. Птушку правяраць не трэба, яна не хварэе на бруцэлёз. Рэжым Лукашэнкі ўсяляк хавае гэтую навіну і баіцца яе агалоскі», – гаворыцца ў паведамленні.
Людзям у Беларусі варта абавязкова тэрмічна апрацоўваць сырыя малочныя прадукты.
Раней «Белсат» пісаў, што ў Беларусі гіне вельмі шмат кароў. Толькі за два мінулыя гады ў гаспадарках толькі Менскай вобласці – 35 тысяч.
Арсен Рудэнка belsat.eu