З пачатку вайны расейскія войскі атакавалі цывільныя аб’екты на ўкраінскай тэрыторыі ў 60 разоў часцей, чым ваенныя абʼекты, паведаміў Цэнтр супрацьдзеяння дэзынфармацыі пры РНБА Украіны.
Паводле звестак цэнтру, з пачатку расейскага ўварвання 24 лютага расейскія войскі нанеслі каля 300 удараў па ваенных абʼектах Украіны і 17,3 тысячы – па цывільных.
«У цяперашні час пашкоджана або разбурана больш за 50 % усяго жыллёвага фонду Марыупалю, Харкава, Чарнігава, Бучы, Севераданецку і Лісічанску. А 8 % насельніцтва Украіны – больш за 3,5 млн чалавек, засталіся без жытла», – падлічылі ў Радзе народнай бяспекі і абароны Украіны (РНБА).
Цэнтр супрацьдзеяння дэзынфармацыі Украіны мяркуе, што прычына ўдараў па цывільных абʼектах, між іншага, – нізкая дакладнасць расейскай зброі і ўжыванне састарэлых або ілжывых звестак.
Уначы з 31 ліпеня на 1 жніўня расейцы абстралялі ракетамі цывільныя аб’екты ў Харкаве і Мікалаеве.
Зміцер Міраш belsat.eu
