СМІ: Двух топ-чыноўнікаў з Мінфіну і Мінтрансу судзяць за хабар і «здраду дзяржаве»
Як мяркуецца, двух топ-чыноўнікаў з Мінфіну і Мінтрансу судзяць за хабар і «здраду дзяржаве», піша «Наша ніва».
Такія высновы аўтары робяць у сувязі з інфармацыяй аб закрытым судовым працэсе, які распачаўся ў Менскім гарадскім судзе 27 траўня. Яго будзе весці суддзя Сяргей Кацэр, вядомы па многіх палітычных справах.
На лаве падсудных апынуліся Андрэй Іваноў і 56-гадовы Аляксандр Карзюк. Іх ініцыялы цалкам супадаюць з імёнамі былых беларускіх топ-чыноўнікаў, зазначае рэсурс. Іваноў да 2020-га займаў пасаду намесніка міністра транспарту і камунікацый, а Карзюк да нядаўняга часу ўзначальваў упраўленне фінансаў ЖКГ, транспарту і сувязі Міністэрства фінансаў.
Аляксандр Карзюк ні разу не даваў публічных інтэрв’ю. Вядома толькі, што ён добра гуляе ў шахматы, гаворыцца ў матэрыяле.
Андрэй Іваноў раней узначальваў РУП «Белаўтастрада», якое абслугоўвае сістэму BelToll.
«Беларусь і Расея – суседзі, саюзнікі і аднадумцы», – казаў ён у адным з апошніх сваіх інтэрвʼю на пасадзе.
Чыноўнік ездзіў з працоўнымі камандзіроўкамі ў розныя краіны, уключаючы ЕЗ, але ў сакавіку 2020-га яго раптоўна здымаюць «па дамове бакоў».
Акрамя «атрымання хабару ў буйным і асабліва буйным памерах» па ч.2 і ч.3 КК абодвух мужчын судзяць па ч.2 арт.356 КК (здрада дзяржаве, здзейсненая службовай асобай, якая займае адказнае становішча). Сутнасць абвінавачання невядомая.
Ім пагражае па суме абвінавачанняў да 25 гадоў турмы.
Ася Саковіч belsat.eu
