У Беларусі пачынаюць рыхтавацца да выбараў дэпутатаў – будуць сфармаваныя выбарчыя акругі
Цэнтральная выбарчая камісія Беларусі 27 верасня правядзе паседжанне, на якім будуць арганізаваныя 110 выбарчых акругаў па выбарах дэпутатаў Палаты прадстаўнікоў і мясцовых саветаў.
Выбарчыя акругі фармуюцца ЦВК па прадстаўленні абласных і Менскага гарадскога выканаўчых камітэтаў.
На паседжанні ЦВК плануецца таксама зацвердзіць метадычны дапаможнік для тэрытарыяльных і акружных выбарчых камісіяў.
Прэс-служба ЦВК падкрэслівае, што падрыхтоўка да выбараў дэпутатаў у адзін дзень ідзе ў планавым рэжыме – праводзяцца падрыхтоўчыя мерапрыемствы, навучанне для патэнцыйных арганізатараў выбараў, семінары і нарады.
Стварэнне выбарчых акругаў – чарговы этап падрыхтоўкі да адзінага дня галасавання, які пройдзе ў Беларусі 25 лютага 2024 года. Беларусы будуць выбіраць дэпутатаў Палаты прадстаўнікоў і мясцовых саветаў. На працягу 60 дзён пасля адзінага дня галасавання мусіць прайсці Усебеларускі народны сход.
Марыя Міхалевіч belsat.eu
