Праваабарончы цэнтр «Вясна» паведамляе, што ў судзе Маскоўскага раёну Берасця адбываецца разгляд справы палітзняволенага Аляксандра Кулініча, які памёр у СІЗА ў пачатку красавіка.
Падпалкоўніка запасу Аляксандра Кулініча затрымалі 29 лютага ў Берасці і абвінавацілі ў «знявазе Лукашэнкі». З таго часу яго трымалі ў СІЗА, дзе ён чакаў суда, што меўся адбыцца 16 красавіка.
За тыдзень да суда, 9 красавіка, 51-гадовы мужчына памёр у зняволенні. Нягледзячы на смерць, у электронным раскладзе на сайце Вярхоўнага суда зʼявілася інфармацыя, што справу Аляксандра разглядаюць 30 траўня ў судзе Маскоўскага раёну Берасця. Працэс прызначылі весці суддзю Марыну Скалковіч.
Аляксандр Кулініч нарадзіўся ў Маладзечне 11 красавіка 1972 года, служыў у 38-й асобнай гвардзейскай дэсантна-штурмавой брыгадзе паветрана-дэсантных войскаў у Берасці. Апошнім часам працаваў індывідуальным прадпрымальнікам. Кулініча затрымалі 29 лютага з дзясятак сілавікоў у поўным абмундзіраванні за каментары ў тэлеграме — беларус пісаў пра расейскую акупацыю Беларусі і выказваў падтрыманне Украіне. Яму выставілі абвінавачванне паводле арт. 368 («знявага Лукашэнкі»).
Глеб Нержын belsat.eu
