Каля 1 150 грузавікоў чакаюць выезду з Польшчы ў Беларусь на памежным пункце Кукурыкі, перадае агенцтва PAP. Час чакання – 40 гадзін. З беларускага боку, на пераходзе Казловічы, чаргі няма, сведчыць сайт Дзяржаўнага памежнага камітэту.
Польскія ўлады паведамілі пра павелічэнне чаргі грузавікоў на выезд у Беларусь на памежным пункце Кукурыкі. Ужо назбіралася каля 1 150 фур. Афармлення даводзіцца чакаць 40 гадзін.
У Польшчы канстатуюць, што чарга ўтварылася праз закрыццё пункта Баброўнікі – Бераставіца, а таксама праз забарону польскім грузавікам ехаць у Беларусь праз Літву і Латвію.
У польскай мытнай службе заявілі аб гатовасці павялічыць штат работнікаў, каб паскорыць афармленне.
Пры гэтым на беларускім баку, у Казловічах, чаргі на выезд у Польшчу няма.
Гэты пераход – адзіны, дзе беларуска-польскую мяжу могуць перасекчы грузавыя аўтамабілі. Сёння стала вядома, што Беларусь перастала пускаць фуры польскіх перавозчыкаў з тэрыторыі Літвы і Латвіі.
Сяргей Крот belsat.eu
