Аб’яднаны пераходны кабінет Беларусі паведаміў пра вынікі сустрэчы калектыву «ByPol» з кіраўніцаю Кабінету Святланаю Ціханоўскаю.
У выніку сустрэчы пастанавілі, што аб’яднанне сілавікоў Беларусі, куды ўваходзяць Мацвей Купрэйчык, Уладзімір Жыгар ды іншыя, аддзеліцца ад фонду «ByPol» і блізкім часам вызначыцца з назваю, формай юрыдычнай асобы і кірункамі працы. А ў адказнасці Станіслава Лупаносава і Аляксандра Азарава застаецца план «Перамога».
«План «Перамога» – у поўнай бяспецы, працягваецца праца для яго напаўнення і рыхтавання», – заявілі ў Кабінеце.
Таксама пастанавілі падзяліць медыі «ByPol»: Telegram, Instagram, YouTube застаюцца за Аб’яднаннем сілавікоў Беларусі; Facebook, TikTok і сайт – за «ByPol» пад кіраўніцтвам Азарава.
«Усе ўдзельнікі сустрэчы пагадзіліся прайсці паліграф у незалежнага эксперта за найбліжэйшыя два месяцы», – гаворыцца ў паведамленні.
Апроч таго, у «ByPol» неўзабаве пройдзе фінансавы аўдыт незалежнаю кампаніяй, якую ўхваляць абодва бакі. Выплаціць арганізацыя і пазыкі ў заробках.
Пастаноўлена ўвесці мараторый на ўзаемныя абвінавачванні і публічную крытыку ды любыя дзеянні, якія нясуць шкоду другому боку і «ByPol» як супольнасці.
Канфлікт стаўся публічным, калі Азараў 8 чэрвеня запісаў відэазварот, у якім заявіў, што Купрэйчык і яшчэ «група асобаў» адмовіліся праходзіць паліграф («дэтэктар хлусні»), праз гэта былі звольненыя, але Купрэйчык забраў доступ да акаўнтаў «ByPol» у YouTube і сацыяльных сетак.
Пазней у Telegram-канале «ByPol» з’явіўся пост з абвінавачваннямі ў бок Азарава. Там сцвярджаюць, што Азараў ніколі не быў заснавальнікам ці кіраўніком аб’яднання экс-сілавікоў «ByPol», кіраваў толькі створаным 26 траўня 2021 года фондам «ByPol», а ў аб’яднанні сілавікоў быў «медыйнаю персонаю». Сцвярджаецца таксама, што аб’яднанне сілавікоў не выстаўляла кандыдатуры Азарава ў Кабінет (хоць раней «ByPol» не пратэставаў супраць гэтага, а ад арганізацыі на канферэнцыі, падчас якой быў створаны Кабінет, быў як мінімум яшчэ адзін прадстаўнік).
Якуб Хруст belsat.eu
