Пенсіянера з Ляхавічаў пакаралі 7 гадамі 3 месяцамі калоніі і штрафам 12 тысяч рублёў
Берасцейскі абласны суд пакараў 68-гадовага жыхара Ляхавічаў Барыса Вітко 7 гадамі 3 месяцамі калоніі і штрафам 12 тысячаў рублёў. Раней яму прысудзілі 2 гады «хатняй хіміі».
Справу разглядала суддзя Вера Філонік. Палітвязня Барыса Вітко абвінавацілі паводле пяці артыкулаў Крымінальнага кодэксу за «абразу Аляксандра Лукашэнкі; паклёп; паклёп у дачыненні прэзідэнта; абразу прадстаўніка ўлады; знявагу прэзідэнта, здзейсненую паўторна; распальванне іншай сацыяльнай варожасці або варажнечы; заклікі да мераў абмежавальнага характару (санкцыяў), накіраваных на прычыненне шкоды нацыянальнай бяспецы Рэспублікі Беларусь; у публічных закліках да захопу дзяржаўнай улады, гвалтоўнага змянення канстытуцыйнага ладу Рэспублікі Беларусь, здзяйснення акту тэрарызму і іншых дзеянняў, накіраваных на прычыненне шкоды нацыянальнай бяспецы Рэспублікі Беларусь».
«Паводле матэрыялаў абвінавачання, Вітко са студзеня 2021 года да ліпеня 2022 года наўмысна размясціў у экстрэмісцкіх чатах паведамленні, якія змяшчаюць абразы прадстаўнікоў улады ў сувязі з выкананнем імі службовых абавязкаў», – расказваюць праваабаронцы пра частку абвінавачанняў.
Паводле сукупнасці прысудаў Барысу Вітко прызначанае пакаранне ў выглядзе пазбаўлення волі на тэрмін 7 гадоў 3 месяцы з адбываннем у папраўчай калоніі ва ўмовах узмоцненага рэжыму са штрафам у даход дзяржавы ў памеры 300 базавых велічыняў (12 тысяч рублёў).
У 2022 годзе пенсіянера пакаралі «хатняй хіміяй» за каментар у сацсетках у дачыненні суддзі Мікалая Кміты. 28 лістапада 2023 года КДБ унёс Барыса Вітко ў спіс «тэрарыстаў».
Арсен Рудэнка belsat.eu
