«Перадае ўсім прывітанне». Жонка Алеся Бяляцкага атрымала першы асабісты ліст ад мужа
Жонка зняволенага праваабаронца Наталля Пінчук атрымала першы асабісты ліст-адказ ад Алеся Бяляцкага з моманту яго затрымання.
За два месяцы гэта адзіны ліст, дзе напісана, што ён атрымаў ліст ад яе.
«Значыць, гэта адзіны ліст ад мяне, які ён атрымаў», – адзначае жонка праваабаронцы.
Па словах Наталлі, негатыўнай інфармацыяй Алесь Бяляцкі яе не расстройвае, «піша, што ўсё нармальна» і перадае ўсім прывітанне. Дзеліцца, што цяпер чытае кнігу Харукі Марукамі «Паляванне на авечак».
Учора, 25 верасня, Алесь Бяляцкі адзначыў свой дзень нараджэння за кратамі. Яму споўнілася 59 год.
Заснавальнік і кіраўнік Праваабарончага цэнтру «Вясна» Алесь Бяляцкі быў затрыманы 14 ліпеня 2021 года ў межах маштабнай атакі спецслужбаў на праваабарончую супольнасць Беларусі. Яму выставілі абвінавачванне паводле арт. 342 («Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх») і арт. 243 («Ухіленне ад выплаты падаткаў») Крымінальнага кодэксу. Цяпер ён знаходзіцца ў СІЗА №1 у Менску. Алесь Бяляцкі прызнаны палітвязнем.
Падтрымаць затрыманых праваабаронцаў «Вясны» можна па адрасах:
- СІЗА-1, 220030, г. Мінск, вул. Валадарскага, 2 (Алесь Бяляцкі, Валянцін Стэфановіч, Уладзімір Лабковіч, Марфа Рабкова, Андрэй Чапюк);
- СІЗА-3, 246003, г. Гомель, вул. Кніжная, 1А (Леанід Судаленка, Таццяна Ласіца).
АД, belsat.eu
