Кіраўнік праекту «Bellingcat» Хрыста Грозэў мяркуе, што праз паўгода Яўгеній Прыгожын або будзе забіты, або ўчыніць новы мяцеж. Як заявіў журналіст-расследавальнік у інтэрв’ю «Financial Times», наступная спроба перавароту можа адбыцца з удзелам расейскай эліты.
Журналіст-расследавальнік Хрыста Грозэў звярнуў увагу на тое, што расейскі прэзідэнт Уладзімір Пуцін у тэлезвароце назваў кіраўніка ПВК Вагнэра Яўгенія Прыгожына здраднікам:
«Усе ведаюць, што робяць са здраднікамі, а Пуцін гэтага не зрабіў. Ён хоча бачыць Прыгожына мёртвым. Пакуль ён гэтага зрабіць не можа. Праз паўгода Прыгожын або памрэ, або адбудзецца другі пераварот».
Кіраўнік праекту «Bellingcat» упэўнены, што ў вайне ва Украіне зацікаўлены толькі расейскі вайскова-прамысловы комплекс. Астатнія маўчаць, бо гэта «дылема зняволенага»: яны не хочуць быць першымі ці адзінымі.
На думку Грозэва, адхіленне Пуціна ад улады можа пайсці паводле двух сцэнароў:
«Або дылема зняволенага будзе знятая, або ад яго проста пазбавяцца шляхам скаардынаванага перавароту. Пакуль гэтага няма ні сярод алігархаў, ні сярод міністраў, ні ў ФСБ. Аднак для астатняй эліты жыць ва ўмовах Паўночнай Карэі з замарожанымі банкаўскімі рахункамі непажадана».
Сваю ролю ў другой спробе мяцяжу могуць адыграць і іншыя падзеі, адзначыў балгарскі журналіст: «Напрыклад, пералом на фронце».
Кіраўнік ПВК Вагнэра ўчыніў спробу мяцяжу ў чэрвені. Баевікі ўзялі пад кантроль Растоў-на-Доне і рушылі калонаю на Маскву. Паўстанне скончылася перамовамі, найміты вярнуліся ў свае палявыя лагеры. Пазней частка баевікоў пераехала ў Беларусь.
Сяргей Крот belsat.eu