Пуцін прызнаў незалежнасць «ЛНР» і «ДНР». Захад адрэагаваў чарговымі пагрозамі санкцыяў. Украінскія палітыкі заклікаюць захоўваць спакой і кажуць, што да ўсяго гатовыя. Расказваем, што думаюць звычайныя ўкраінцы.
Горад Сумы – абласны цэнтр з 258 тысячамі жыхароў у менш як 30 км ад мяжы з Курскай вобласцю Расеі наўпрост ці ў 50 км па дарозе. Шэф-рэдактар навінаў каналу «Суспільне Суми» Андрэй Крамчанкоў кажа «Белсату»: хоць не можа адказваць за ўсіх гараджанаў, бо не праводзіў сацыялагічнага даследавання, але бачыць, што панікі няма, а звычайнае жыццё трывае.
«Я думаю, што людзі проста звыклі, – разважае ён. – Я думаю, што гэта такі фаталізм: будзе як будзе.
Але ў нас украінскае грамадства яшчэ з 2014 года фактычна падзялілася на дзве асобныя краіны. Краіна, якая ваюе, сядзіць на акопе і ў бліндажы або валанцёрыць ці скідваецца на валанцёрства. І асобная частка грамадства, якая не ваюе, якая стамілася ад вайны і не бярэ ўдзелу. Між гэтымі краінамі пакт аб ненападзе, адна адну не чапаюць».
Які падзел у адсотках, ён не ведае, але бачыць: тая частка, якая ваюе, рыхтуецца да магчымай расейскай агрэсіі, а тая, што не ваюе, не ўцякае на захад і не раскупае тушаніну і макароны, «як не заўважала вайны, так і не хоча заўважаць».
Дырэктар амерыканскай інвестыцыйнай кампаніі і кіраўнік бізнес-цэнтру ў Сумах Ягор Губенка пацвярджае: панічных настрояў у горадзе няма: чэргаў па запалкі і грэчку або чэргаў у банкаматы няма. Але людзі разумеюць пагрозу, акрамя «асабліва адбітых, якія лічаць, што ўсё цудоўна», што галоўнае – «вясной ім бульбу садзіць». У кожнага ёсць свой план дзеянняў, які залежыць ад магчымасцяў: хтосьці ўступае ў Тэрытарыяльную абарону, хтосьці перадусім думае, як перавезці сям’ю.
«Людзі падрыхтаваныя, людзі не панікуюць – гэта асноўны наратыў, які ёсць у нас у горадзе», – кажа ён пра Сумы.
Што да бізнесу, то за мінулыя месяц-два ў ягоным цэнтры не было такіх арандатараў, якія сказалі б, што зачыняюцца, бо магчымая вайна. Краіна жыве ў рэаліях вайны ўжо 8 гадоў, кажа ён, і інфармацыйныя нагоды «трыгераць, калі чытаеш, а потым за 5-10 хвілін, калі аналітычна падумаеш, дык глядзіш: нічога не змянілася». Людзі выязджаюць на працу ці адпачынак – і вяртаюцца.
У 2014 годзе было страшна, бо фактычна не было арміі і паліцыі, не было зброі, згадвае Губенка. Тады ён ініцыяваў «Аўтамайдан» у Сумах, потым займаўся валанцёрскай дзейнасцю. Тады людзям на фронт збіралі каскі і бронекамізэлькі, адзежу. Цяпер дапамога арміі ўжо не такая: збіраюць больш спецыялізаваныя рэчы, як то маскавальныя сеткі ці лічбавыя прылады або нечаканыя прысмакі-пачастункі.
Губенка знаходзіць пазітыўны бок у тым, што калі раней за мяжой хтосьці сумняваўся, ці не грамадзянская вайна ва Украіне, то давядзецца прызнаць, што «чорнае гэта чорнае, а не трошачкі шэрае і недзе белае».
Харкаў, у якім жыве 1,43 млн чалавек, таксама ў 30 км ад мяжы з Расеяй – блізу Белгародскай вобласці. Харкаўская праваабаронца Марыя Ясяноўская расказвае, што ў горадзе «калі не чытаць навінаў, усё выглядае як заўсёды». Хіба па горадзе стала ездзіць больш машынаў «хуткай дапамогі»: магчыма, нервы ў людзей не вытрымліваюць.
«Выглядае, нібы ўсё нармальна, усё як заўсёды, але вельмі моцна адчуваецца агульная напружанасць», – апісвае яна Харкаў.
У Харкаве таксама ёсць як тыя, хто запісваецца ў Тэрытарыяльную абарону і рыхтуецца да вайны, так і тыя, хто думае пра ад’езд, але куды менавіта ехаць – незразумела. Эмоцыі ідуць хвалямі ад спакою да панікі – і назад. Які настрой пераважае, сказаць цяжка: горад вялікі. Людзі не кажуць у азначэннях «будзе вайна» ці «не будзе вайны»: пытанне ў тым, ці зачэпіць баявымі дзеяннямі непасрэдна Харкаў.
Ці засталіся тыя, хто чакае, што «прыйдзе Пуцін і ўратуе»? Ясяноўская кажа, што публічных акцыяў ці выступаў з такімі словамі няма – хіба на кухнях такое хтосьці можа казаць. А ёсць акцыі на падтрымку Украіны, нядаўна быў буйны марш за еднасць Украіны.
Краматорск – цяперашні адміністратыўны цэнтр Данецкай вобласці. У горадзе жыве 150 тысяч чалавек, ад яго да «ДНР» цяпер 70 км. Але вясной 2014 годзе горад бралі байцы «ДНР», у сярэдзіне лета 2014-га іх выгналі Узброеныя сілы Украіны. Каардынатар Цэнтру грамадзянскага кантролю «Дій-Краматорськ» Андрэй Раманенка расказвае: цяпер там меркаванні не такія, як на лініі размежавання – хутчэй такія ж, як у Кіеве. Але жыхары Краматорска добра ведаюць, што такое «ДНР», бо адтуль у горад прыязджаюць, каб атрымаць пенсіі.
«Тут вельмі разнастайнае насельніцтва, – тлумачыць ён. – Нельга адмаўляць, што нехта ёсць, хто радуецца, што ўсё гэта адбываецца, і ўсе гэтыя гады чакаў вяртання гэтых «народных рэспублік». Ёсць тыя, хто вельмі хвалюецца і спрабуе з’язджаць, але я не магу сказаць, што горад спусцеў, што стала менш машынаў. Гэта не масавыя панічныя настроі. Але ёсць людзі, якія разумеюць пагрозу, хтосьці плануе, куды эвакуяваць сям’ю. У каго ёсць магчымасць, запісваюцца ў войска ці Тэрытарыяльную абарону».
З апошнім нечаканая праблема: Тэрытарыяльная абарона Данецкай вобласці запоўненая на 70 %, у сацсетках масава пішуць, што хацелі б запісацца, а не здолелі, бо там усё запоўнена, пераказвае Раманенка.
«І ёсць група людзей, якіх я б назваў большасцю: яны не заўважылі, што нешта змянілася, альбо спрабуюць рабіць выгляд, што нічога не змянілася», – кажа Раманенка пра Краматорск.
У Краматорску людзі на ўласныя вочы бачаць, што ўкраінская армія ўжо зусім не такая, якой была ў 2014 годзе. У 2014-15 гадах, калі пасля вызвалення вялікай часткі тэрыторыі фронт пачаў крыху адкатывацца назад, згадвае Раманенка, «тады настрой быў значна больш нервовы».
Ад цэнтру Марыупаля да тэрыторыі, падкантрольнай «ДНР», менш за 20 км, а ад ускраіны гораду – усяго 10 км. Вясной 2014 года горад узялі байцы «ДНР», але ў пачатку лета ўкраінская армія выгнала іх. Цяпер там жыве звыш 430 тысяч чалавек. Галоўны рэдактар Марыупальскай тэлевізіі Уладзімір Селіванаў упэўнена кажа, што апошнія гады тры, дзякуючы працы вайскоўцаў і сілавікоў, гэта «самы бяспечны горад Украіны», сістэма бяспекі на вельмі высокім узроўні.
У горадзе людзі жывуць спакойна, усе працуюць і вучацца, «парадак поўны», кажа ён, і нават здзіўляецца пытанню пра настроі ў Марыупалі. За апошнія дні ён не заўважыў зменаў. І нават няма запыту на інфармацыю пра тое, дзе бамбасховішчы або як і куды ўцякаць з гораду. Людзей хвалюе праца транспарту або дыстанцыйнае навучанне ў школах праз каронавірус. Людзі звыклі да спакойнага жыцця, давяраюць гарадскім уладам.
«Я не бачыў, каб хтосьці панікаваў, быў раздражнёны, хваляваўся, сумняваўся, мяняў нейкія планы, – расказвае галоўны рэдактар Марыупальскай тэлевізіі. – Ёсць элемент згуртавання, падтрымкі адзін аднаго, але элементы хвалявання – я не сустракаў».
Журналіст робіць агаворку: можа, у яго такое кола стасункаў, але гэтае кола ў яго даволі шырокае і вельмі разнастайнае. І такіх, хто казаў бы «паглядзіце на мапу, там пад горадам такое», сустракаць не даводзіцца.
Алесь Наваборскі belsat.eu