Інфармацыя пра чарговую смерць на мяжы прагучала ў праграме «Панарама» на тэлеканале «Беларусь 1» увечары 7 кастрычніка. Загінулы – 29-гадовы грамадзянін Шры-Ланкі.
Цела мігранта знайшлі нібыта ў 500 метрах ад літоўскай мяжы 5 кастрычніка. Пры ім былі дакументы, згодна з якімі імя памерлага – Рыгавана Кірушантана. Мужчыне было 29 гадоў, ён – грамадзянін Шры-Ланкі.
– Паводле наяўнай аператыўнай інфармацыі дадзены грамадзянін уваходзіў у групу асобаў, якіх літоўскія сілавікі спрабавалі неаднаразова незаконна выцесніць на тэрыторыю Рэспублікі Беларусь, – заявіў у эфіры дзяржаўнага тэлеканалу прадстаўнік Полацкага памежнага атраду Дзяніс Глябко.
Пра першы выпадак смерці мігранта на беларуска-літоўскай мяжы беларускія памежнікі паведамілі 4 жніўня. Тады грамадзянін Іраку загінуў нібыта пасля збіцця.
19 верасня беларускія памежнікі знайшлі цела 39-гадовай жанчыны – грамадзянкі Іраку. У той жа дзень трое загінулых былі знойдзеныя на польскім баку мяжы. Усе яны загінулі ад пераахалоджвання.
Яшчэ адзін выпадак смерці мігранта, гэтым разам нібыта ад сардэчнага прыступу, зафіксавалі польскія памежнікі 24 верасня.
ГГ, belsat.eu
