Міністэрства абароны Беларусі паведамляе, што падраздзяленні механізаваных брыгад прыступілі да сумесных заняткаў з інструктарамі ПВК Вагнэра.
«Упор робіцца на вядзенне баявых дзеянняў у сучасных умовах, адпрацоўваюцца элементы актыўнай абароны, а таксама пытанні забеспячэння жывучасці на поле бою з улікам актыўнага выкарыстання беспілотнай авіяцыі», – гаворыцца ў паведамленні прэс-службы міністэрства.
Як зазначае БелТА, беларускія вайскоўцы адпрацавалі штурм апорнага пункта пры падтрымцы артылерыі і танкавых падраздзяленняў. Адной з асаблівасцяў сумеснага трэнавання стала зʼяўленне новых уводных ужо ў працэсе заняткаў.
БелТА, спасылаючы на беларускіх вайскоўцаў, адзначае, што досвед вагнэраўцаў «унёс значнае карэктаванне ў трэнавальны працэс». Напрыклад, раней беларускія жаўнеры больш займаліся абарончымі дзеяннямі і наступам на адкрытых пляцоўках, а цяпер вялі наступленне па балоцістай мясцовасці, лесам, а таксама рухаліся пешшу, а не на тэхніцы.
Нагадаем, спачатку вагнэраўцы праводзілі заняткі з байцамі тэрабароны Беларусі. Потым на палігоне «Берасцейскі» трэнавалі жаўнераў Сілаў спецыяльных аперацыяў. Паводле Мінабароны, у баевікоў будуць вучыць не толькі ССА і механізаваныя падраздзяленні, але таксама інжынерныя войскі, войскі сувязі, войскі радыяцыйнай, хімічнай і біялагічнай абароны.
Акрамя таго, найміты плануюць трэнаваць падраздзяленні МУС.
Глеб Нержын belsat.eu