Міністэрства абароны Беларусі паведаміла ў сваім тэлеграм-канале, што беларускія вайскоўцы праводзяць трэнаванні разам з байцамі ПВК Вагнэра на палігоне «Берасцейскі».
«Цягам тыдня падраздзяленні сілаў спецыяльных аперацыяў супольна з прадстаўнікамі кампаніі адпрацуюць вучэбна-баявыя задачы на палігоне «Берасцейскі», – гаворыцца ў паведамленні Мінабароны.
Палігон «Берасцейскі» размешчаны ўсяго за некалькі кіламетраў ад мяжы з Польшчай і недалёка ад мяжы ўкраінскай.
Нагадаем, што 19 ліпеня ў Беларусь прыехала шостая калона вагнэраўцаў, у складзе якой было каля 100-120 машын. З некаторых ацэнак, цяпер у Беларусі могуць быць ужо больш за 2 тысячы байцоў ПВК Вагнэра. У Галоўным упраўленні выведкі Украіны мяркуюць, што асноўная функцыя, якую будуць выконваць вагнэраўцы ў Беларусі, якраз і будзе зводзіцца да правядзення інструктажу беларускіх вайскоўцаў, а таксама застрашвання суседніх краінаў NATO.
Учора з’явіўся зварот Яўгенія Прыгожына, кіраўніка ПВК Вагнэра, да сваіх байцоў, у якім ён паабяцаў зрабіць беларускую армію «другой арміяй свету».
Раман Шавель belsat.eu