Сілавікі затрымалі вядомага менскага рэпетытара Яўгена Лівянта. Пра гэта паведаміў праект «Медиазона. Беларусь».
Рэпетытар і сузаснавальнік цэнтру рыхтавання да ЦТ «100 балаў» Яўген Лівянт затрыманы сілавікамі. Ягоныя відэапрызнанні распаўсюдзілі праўладныя тэлеграм-каналы. На відэа Лівянт кажа, што ўдзельнічаў у адным з паседжанняў Каардынацыйнай рады ў жніўні 2020 года.
«Удзельнічаў не толькі ў перакрыцці дарог і масавых парушэннях парадку, але і непасрэдна распачаў спробу захопу дзяржаўнай улады шляхам удзелу ў так званым «каардынацыйным савеце», – напісаў адзін з праўладных тэлеграм-каналаў.
Яўген Лівянт – педагог, сузаснавальнік адукацыйнага цэнтру «100 балаў», які дапамагае старшакласнікам рыхтавацца да ЦТ. Паводле інфармацыі ад падпісальнікаў старонкі педагога ў Facebook, яго забралі проста з уроку.
Антон Тачняк belsat.eu