Аляксандр Лукашэнка ўдзень 27 чэрвеня выступіў перад кіраўнікамі сілавых ведамстваў і расказаў, што ў час мяцяжу Прыгожына рыхтаваўся бараніцца ад Захаду і каліноўцаў. Пасля, як расказвае БелТА, Лукашэнка выказаў незвычайную падзяку на сустрэчы з міністрам абароны.
«Можа быць, дзіўным будзе пачынаць размову з таго, што я скажу, – звярнуўся Аляксандр Лукашэнка да міністра абароны Віктара Хрэніна. – Гэты перапалох у Расеі, вядома, і нас напружыў вельмі сур’ёзна. Вайскоўцы нашыя адрэагавалі нядрэнна. Усе вайскоўцы. І міліцыя, і памежнікі. Выразна адрэагавалі, на працягу паўдня былі прыведзеныя ў патрэбны стан. Гэта нашая праца, так павінна быць.
Але я жадаю падкрэсліць і напярэдадні свята падзякаваць вашым тылам: семʼям, жонкам, дзецям.Я асабліва гэта адсочваў: ні адна жонка, ні адна сямʼя не бухцела, не плакалася. З разуменнем гэта ўспрынялі. І нават з нейкім энтузіязмам.
Таму мая падзяка жонкам, дзецям, семʼям нашых вайскоўцаў. Гэта сапраўды тыл. Гэта сапраўды адзінства і маналіт. Але ні ў якім разе не расслабляцца».
Хрэнін пагадзіўся, абяцаў перадаць падзяку.
Паводле расейскіх і беларускіх дзяржаўных медыяў, Лукашэнка ў Беларусі прытуліў Яўгенія Прыгожына – лідара баевікоў Групы Вагнэра, які 23–24 чэрвеня ўчыніў вайсковы мяцеж, але развярнуў калоны на паўдарогі да Масквы, бо нібыта дамовіўся з удзелам Лукашэнкі на тое, што яго выпусцяць у Беларусь. 27 чэрвеня ў Беларусі заўважылі два самалёты Прыгожына, але дзе сам лідар баевікоў, невядома.
Уладзімір Пуцін тым часам двойчы цягам содняў рабіў пяціхвілінныя выступы, на якіх тлумачыў, што бяздзеянне падчас мяцяжу – усё так і было задумана. За межамі Расеі заўважылі бяздзеянне і расцанілі гэта як слабасць Расеі. У Брытаніі нават пастанавілі рыхтавацца да раптоўнага краху Расеі. Злучаныя Штаты заявілі, што ведалі пра рыхтаванне мяцяжу, але не сталі зрываць планаў баевікоў.
Алесь Наваборскі belsat.eu