«Пачатак чагосьці новага». У Брытаніі пастанавілі рыхтавацца да раптоўнага краху Расеі
Вялікая Брытанія мусіць рыхтавацца да раптоўнага краху Расеі. Пра гэта пасля няўдалай спробы дзяржаўнага перавароту ў Расеі папярэджваюць унутраныя ацэнкі брытанскага ўраду, піша «The Times».
Як адзначаецца, рыхтавацца да сцэнара нечаканага распаду РФ пастанавілі дзеля таго, каб такія падзеі не заспелі Лондан знянацку.
Медыя паведамляе, што яшчэ з пачатку поўнамаштабнай вайны ў Лондане меркавалі, што гэта можа скончыцца для Расеі нестабільнасцю ўнутры краіны. Але тэмпы развіцця падзеяў з моманту мяцяжу Яўгенія Прыгожына заахвоцілі дыпламатаў хутка рыхтаваць план дзеянняў паводле розных сцэнароў.
«Мы мусім чакаць і глядзець, што будзе далей. Гэта можа быць толькі пачатак чагосьці новага», – адзначыў суразмоўца выдання.
Былы вайсковы аташэ Брытаніі ў Маскве Джон Формэн заявіў, што тэмпы развіцця падзеяў 23–24 чэрвеня заспелі заходніх дыпламатаў знянацку.
«Мы думалі, што ўсё гэта будзе адбывацца паступова. Пра нечаканы «марш на Маскву» не вялося», – падзяліўся ён.
У сваю чаргу, былы амбсадар Брытаніі ў Расеі Родэрык Лайн мяркуе, што пасля мяцяжу шанцы Уладзіміра Пуціна пажыццёва заставацца кіраўніком Расеі ўжо меншыя, але «той усё яшчэ на сваёй пасадзе».
https://belsat.eu/news/24-04-2023-kali-zgnie-gety-monstr-rasejskiya-separatysty-pra-buduchynyu-rf-i-nezalezhnasts-narodau
Якуб Хруст belsat.eu
