Супольнасць чыгуначнікаў Беларусі паведамляе пра рэзкі рост аб’ёмаў экспартнага транспартавання наліўных цягнікоў з авіяцыйным рэактыўным палівам у Расею.
«За апошнія 10 дзён фактычна з нуля рэзка павялічаныя абʼёмы экспартнага транспартавання са станцыі «Барбараў» (Гомельскае аддзяленне БЧ – НОД-4) наліўных складаў з авіяцыйным рэактыўным палівам на станцыі «Маскоўскай» (МскЧ) і «Кастрычніцкай» (АктЧ) чыгунак Расейскай чыгункі на адрасы паліўных сховішчаў Масквы, Санкт-Пецярбургу, Курску і Петразаводску», – гаворыцца ў паведамленні.
Мяркуючы са станцыі адпраўлення, пастаўкі ідуць з Мазырскага НПЗ.
Зафіксаваныя станцыі прызначэння Расейскай чыгункі на сённяшні дзень:
- Міжнародны аэрапорт «Унукава» (VKO):
– станцыя «Аэрапорт» (МскЧ). - Міжнародны аэрапорт «Дамадзедава» (DME):
– станцыя «Космас» (МскЧ). - Міжнародны аэрапорт «Жукоўскі» (ZIA):
– станцыя «Нагінск» (МскЧ);
– станцыя «Пярова» (МскЧ). - Нафтапрадуктаперапампоўчая станцыя ГПС «Шылава-3»:
– станцыя «Шалухава» (МскЧ). - Міжнародны аэрапорт Пулкава (LED):
– станцыя «Лігава» (АктЧ);
– станцыя «Верава» (АктЧ);
– станцыя «Фрэзерны» (АктЧ);
– станцыя «Стары Пецяргоф» (АктЧ). - Міжнародны аэрапорт «Курск – Усходні» (URS):
– станцыя «Рышкава» (МскЧ). - Міжнародны аэрапорт «Петразаводск» (PES):
– станцыя «Томіцы» (АктЧ).
Нагадаем, некалькі месяцаў таму Украіна пачала выкарыстоўваць новую тактыку і накіроўваць ударныя БПЛА на буйныя расейскія НПЗ. Гэта прывяло да істотнага скарачэння вытворчасці нафтапрадуктаў у Расеі. Эксперты выказвалі засцярогі, што калі Беларусь будзе пастаўляць нафтапрадукты для расейскага войска, то беларускія НПЗ могуць стаць законнай мішэнню для ўкраінскіх удараў. Мазырскі НПЗ размешчаны за 40 км ад мяжы з Украінай.
Ася Саковіч belsat.eu
