Калі Польшча перадасць Украіне танкі «Leopard 2», урад Нямеччыны не будзе супраць, заявіла міністарка замежных справаў Нямеччыны Аналена Бэрбак. Палітык дадала, што ў краіне ведаюць, наколькі гэтыя танкі неабходныя Украіне.
«Мы не будзем перашкаджаць. Цяпер гэтага пытання не задавалі, але, калі б нас спыталі, мы б не сталі перашкаджаць», – адказала на пытанне журналіста міністарка замежных справаў Нямеччыны Аналена Бэрбак.
Палітык падкрэсліла, што Нямеччына ведае, наколькі танкі «Leopard 2» важныя для Кіева: «Мы павінны пераканацца, што жыцці людзей будуць уратаваныя, а тэрыторыя Украіны – вызваленая».
Прэзідэнт Украіны Уладзімір Зяленскі мяркуе, што перадача саюзнікамі дзясяткаў танкаў «не развяжа праблемы», бо ў Расеі – «тысяча танкаў». На ягоную думку, перадача ўзбраення адыгрывае матывіровачную ролю.
Раней, падчас візіту ў Кіеў 11 студзеня, польскі прэзідэнт Анджэй Дуда паабяцаў перадаць Украіне нямецкія танкі «Leopard 2». Аднак потым высветлілася, што гэтага рашэння не ўзгаднілі з Нямеччынаю. Паводле законаў Нямеччыны, краіны, на ўзбраенні якіх стаіць зброя нямецкай вытворчасці, не маюць права рээкспартаваць яе ў зону баявых дзеянняў без згоды ўладаў ФРГ.
Алена Рувіна belsat.eu