Рада Еўразвязу ў аўторак, 20 верасня, ухваліла вылучэнне Украіне макрафінансавай дапамогі памерам € 5 мільярдаў. Пра гэта гаворыцца ў прэс-рэлізе Рады ЕЗ.
Пастанову пра дадатковую дапамогу Украіне прынялі на нефармальным паседжанні Рады ЕЗ ў эканамічных і фінансавых пытаннях (Ecofin) у Празе яшчэ 9 верасня. 20 верасня вылучэнне дапамогі канчаткова зацвердзілі.
«Еўразвяз падтрымлівае Украіну. Мы выконваем свае абяцанні і дапамагаем гарантаваць, што ўкраінская дзяржава і яе ключавая інфраструктура могуць працягваць функцыянаваць, нягледзячы на агрэсіўную вайну Расеі. На наступных паседжаннях рады я буду настойваць на хуткім дасягненні пагаднення аб наданні рэшты памерам € 3 мільярды, для якой мы таксама павінны дамовіцца аб размеркаванні гэтай сумы на пазыкі і гранты», – заявіў міністр фінансаў Чэхіі, якая старшынюе ў ЕЗ, Збынек Станюра.
Макрафінансавую дапамогу нададуць Украіне ў форме доўгатэрміновых пазыкаў на ільготных умовах.
Цяперашнія € 5 мільярдаў – гэта ўжо другі транш у межах запланаванай макрафінансавай дапамогі Еўразвязу Украіне на суму € 9 мільярдаў, пра што Еўрапейская камісія абвесціла 18 траўня 2022 года. Еўрапейская Рада падтрымала гэтую пастанову 23–24 чэрвеня.
Міністэрства фінансаў Украіны заявіла, што дапамогу ЕЗ накіруе на фінансаванне першачарговых патрэбаў дзяржбюджэту, яна паспрыяе захаванню фінансавай стабільнасці Украіны.
Марыя Міхалевіч belsat.eu