Генштаб ЗСУ ў ранішняй зводцы за 20 чэрвеня паведамляе, што ноччу расейская армія запусціла па Украіне 30 беспілотнікаў («Шагэдаў»), а таксама 7 ракетаў з сістэмаў С-300.
Ракетамі Расея абстрэльвала Запарожжа і прыгарады. Кіраўнік Запарожскай абласной адміністрацыі ноччу пісаў, што людзі, паводле папярэдніх звестак, не пацярпелі.
Па Кіеве хвалямі запускалі дроны з розных кірункаў. Паветраная трывога цягнулася больш за тры гадзіны, былі збітыя каля 20 дронаў.
«Гэта толькі другая атака іранскімі дронамі па Кіеве з пачатку месяца і першая за апошнія 18 дзён», – паведамілі ў Кіеўскай абласной вайсковай адміністрацыі.
Быў «прылёт» у Львове.
«Папярэдне: у Львове ёсць траплянне ў аб’ект крытычнай інфраструктуры. Людзі не пацярпелі. Быў пажар. На месцы працуюць усе службы», – паведаміў кіраўнік Львоўскай абласной вайсковай адміністрацыі Максім Казіцкі.
Паветраная трывога таксама гучала ў Харкаўскай вобласці.
Раніцай Генштаб ЗСУ паведаміў, што, паводле папярэдніх звестак, 28 з 30 запушчаных расейцамі «Шагэдаў» былі ліквідаваныя.
Цягам апошніх содняў расейцы правялі каля 70 абстрэлаў з рэактыўных сістэмаў залпавага агню і нанеслі больш за 45 авіяўдараў, ёсць пацярпелыя сярод насельніцтва. Імавернасць ракетных і авіяцыйных удараў па ўсёй тэрыторыі Украіны застаецца высокай, папярэджвае Генштаб ЗСУ.
Марыя Міхалевіч belsat.eu