«Белсат» падводзіць вынікі 564-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 10 верасня чытайце ў нашым аглядзе.
Купяскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
Прарасейскі тэлеграм-канал «Фронтовая птичка» адзначае зніжэнне тэмпаў наступу Узброеных сілаў РФ на купянскім кірунку, што звязана з асаблівасцямі рубяжоў абароны ўкраінцаў, а таксама прыбыццём іхных рэзерваў. Пры гэтым крыніца сцвярджае, што ініцыятыва ўсё адно застаецца за УС РФ.
Расейскі ваенкор Сямён Пегаў фіксуе атаку на ўкраінскія пазіцыі каля сяла Сінькаўка ў Купянскім раёне Харкаўскай вобласці.
У сваю чаргу Збройныя сілы Украіны двойчы атакавалі каля сяла Куземаўка ў Сватаўскім раёне Луганскай вобласці.
На ліманскім кірунку працягваюцца баі каля сяла Новаягораўка ў Луганскай вобласці, а таксама на тэрыторыі Серабранскага лясніцтва. На апошнім участку актыўнасць праяўляюць адразу абодва бакі канфлікту.
Зменаў па лініі фронту на купянскім і ліманскім кірунках цягам апошніх содняў не зафіксавана.
Бахмуцкі кірунак (ваколіцы аднайменнага райцэнтру ў Данецкай вобласці)
Паводле Генеральнага штабу Збройных сілаў Украіны, на паўночным усходзе ад Бахмуту УС РФ атакавалі каля сяла Бераставое, але поспеху не дасягнулі. Аналагічная сітуацыя назіралася і на паўночным захадзе, дзе расейцы намагаліся прарваць украінскую абарону каля Арэхава-Васільеўкі.
Тэлеграм-канал «Бахмутський Балу» піша, што таксама на паўночным захадзе ідуць пазіцыйныя баі каля суседняга сяла Бярхоўка.
На захадзе ад раённага цэнтра войскі РФ шукалі слабыя месцы ў абароне праціўніка каля сяла Багданаўка, але таксама не дасягнулі поспеху.
На поўдні бахмуцкага кірунку ініцыятыва захоўваецца за ЗСУ: тут яны наступаюць у населеным пункце Клішчэеўка, а таксама каля Андрэеўкі і Курдзюмаўкі.
«Бахмутський Балу» адзначае прасоўванні калі апошніх двух сёлаў.
Аўдзееўскі і мар’інскі кірункі (на поўначы і захадзе ад Данецку)
Украінскае камандаванне піша пра адбіццё 15 атак праціўніка ў горадзе Мар’інка.
У сваю чаргу адпаведнае расейскае ведамстве паведамляе пра няўдалыя атакі ЗСУ каля Вадзянога і Краснагораўкі.
Разам з тым праўкраінскія крыніцы пішуць пра поспехі Збройных сілаў на поўдні ад гораду Аўдзееўка. У прыватнасці аналітыкі праекту Deepstate фіксуюць прасоўванні ўкраінскіх вайскоўцаў на поўначы ад сяла Вопытнае і замацаванне на ягоных ускрайках. Адзначаецца, што цяпер баі ідуць у самім населеным пункце.
Бярдзянскі кірунак (лінія фронту на паўднёвым захадзе Данецкай вобласці, а таксама на ўсходзе Запарожскай)
На бярдзянскім кірунку цягам апошніх содняў Збройныя сілы Украіны працягнулі наступальныя аперацыі ў ваколіцах населеных пунктаў Новаданецкае і Новамаёрскае.
У Deepstate фіксуюць прысутнасць украінскіх вайскоўцаў на паўночным захадзе апошняга населенага пункту.
У гэты ж час на ўсходзе (ваколіцы Вуглядару) і захадзе (так званы ўрэмеўскі выступ) назіраецца адноснае зацішша: пра наземныя аперацыі ніводнага з бакоў канфлікту не паведамляецца.
Мелітопальскі кірунак (лінія фронту ў Запарожскай вобласці)
На мелітопальскім кірунку працягваецца наступальная аперацыя Збройных сілаў Украіны ў Палогаўскім раёне Запарожскай вобласці.
Сямён Пегаў піша пра атакі ЗСУ на ўсходзе ад сяла Копані і на паўночным усходзе ад Новапракопаўкі. На апошнім участку ваенкор фіксуе прасоўванне ўкраінскіх вайскоўцаў.
У гэты ж час самыя воіны ЗСУ пішуць аб прасоўванні на абодвух кірунках: удалося заняць некалькі пазіцыяў каля Копаняў, а таксама выйсці да першай лініі абароны расейцаў на ўсходзе ад Новапракопаўкі. На апошнім участку сітуацыя застаецца складанай, паколькі пад кантролем праціўніка застаецца важная вышыня 160 метраў.
Таксама байцы 46-й брыгады ЗСУ фіксуюць франтальнае выцісканне расейцаў на подступах да Вербавага з захаду і паўднёвага захаду.
Адзначаецца, што сам населены пункт не з’яўляецца асноўнай мэтай украінцаў, паколькі знаходзіцца ў нізіне. Таму кантроль над ім будзе мэтазгодны толькі пасля займання вышыняў на поўначы і поўдні ад сяла.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Таццяна Міронава belsat.eu
