Захоп закладнікаў у СІЗА Растова-на-Доне завяршыўся штурмам. Як паведаміла Федэральная служба выканання пакаранняў, «злачынцы ліквідаваныя», работнікі ізалятару «вызваленыя і не пацярпелі». Спачатку ведамства не ўдакладніла, ці ўсе шэсць тэрарыстаў забітыя, аднак пазней пацвердзіла гэтую інфармацыю, перадае прапагандысцкі канал RT.
Шасцёра зняволеных узялі ў закладнікі двух супрацоўнікаў СІЗА і патрабавалі машыну, каб можна было ўцячы. Улады паведамілі, што вядуць перамовы, і рыхтаваліся да штурму. Цэнтр Растова-на-Доне, дзе знаходзіцца следчы ізалятар, перакрылі, туды сцягнулі сілавікоў.
Спачатку на тэрыторыю СІЗА заехала машына хуткай дапамогі, следам за ёю – група спецназа. Неўзабаве прагучаў выбух і пачалася страляніна.
«Падчас спецыяльнай аперацыі ў вызваленні закладнікаў злачынцы ліквідаваныя, супрацоўнікі, якія былі ў закладніках, вызваленыя і не пацярпелі», – адсправаздачылася Федэральная служба выканання пакаранняў.
З гэтага паведамлення не было зразумела, ці ўсе злачынцы былі забітыя, аднак пазней у ведамстве пацвердзілі, што ўсе.
На відэа, што раней знялі самі баевікі, яны называлі сябе чальцамі тэрарыстычнай арганізацыі ІГІЛ. Як паведамлялася, трое з іх у снежні летась былі асуджаныя на 18 гадоў і 18,5 года за ўдзел у «Ісламскай дзяржаве» і рыхтаванні да тэракту. Паводле версіі следства, яны планавалі ўзарваць будынак Вярхоўнага суда Карачаева-Чаркесіі.
Медыі таксама звярнулі ўвагу, што менш чым за тыдзень да сённяшняга здарэння рэгіянальнае ўпраўленне Федэральнай службы выканання пакаранняў апублікавала рэпартаж з гэтага СІЗА, у матэрыяле адзначаецца, што ахова ў гэтай установе – найлепшая ў Растоўскай вобласці.
Паводле звестак каналу «Baza», зняволеныя выбілі краты ў сваёй камеры і трапілі ў дзяжурную частку, дзе схапілі двух супрацоўнікаў. Крыніца агенцтва ТАСС пры гэтым казала, што тэрарыстаў утрымлівалі ў розных камерах, але паміж імі была сувязь. Захоп закладнікаў нібыта рыхтаваўся некалькі месяцаў і мог каардынавацца звонку.
Сцяпан Кубік belsat.eu
