Сталі вядомыя падрабязнасці затрымання намесніка кіраўніка БЧ: у яго знайшлі $3 млн
Дзяржаўныя медыі Беларусі і сілавікі раскрылі падрабязнасці затрымання першага намесніка начальніка Беларускай чыгункі Пятра Дулуба. Пра яго затрыманне амаль два тыдні таму паведамляла незалежная «Супольнасць чыгуначнікаў Беларусі».
У эфіры тэлеканала АНТ Пятра Дулуба назвалі найбуйнейшым хабарнікам у гісторыі Беларусі. Яго затрымалі на месцы пасля атрымання грошай ад камерсанта.
Затрыманы грошы хаваў у тайніках кватэры і загараднага дому цешчы. Хабары браў гадамі, але сам пры гэтым вёў аскетычны лад жыцця.
Пачатая крымінальная справа паводле ч.3 арт.430 КК за атрыманне хабару асобай, якая займае адказнае становішча, у асабліва буйным памеры. Дулуба вінавацяць у сістэмным хабарніцтве пры лабіяванні інтарэсаў камерцыйных структураў са сферы грузаперавозак. Агулам канфіскавана больш як $3 млн.
Пра тое, што затрыманы першы намеснік кіраўніка Беларускай чыгункі, яшчэ на пачатку чэрвеня паведаміла «Супольнасць чыгуначнікаў Беларусі». Паводле яе, Дулуб цяпер знаходзіцца ў СІЗА ў Калядзічах. Топ-менеджара затрымалі пры атрыманні ім адмыслова пазначаных купюраў.
Разам з ім сілавікі схапілі намесніка гендырэктара дзяржаўнага транспартава-лагістычнага цэнтру Беларускай чыгункі «Белінтэртранс» Паўла Лушчая, таксама пры перадаванні яму пазначаных банкнотаў.
«Супольнасць чыгуначнікаў» пры гэтым адзначае, што кар’ера Дулуба «паспяхова развівалася пры непасрэдным удзеле [гаманца Аляксандра Лукашэнкі. – рэд. belsat.eu] Мікалая Вараб’я ў сувязі з найбуйнейшымі для краіны і вельмі важнымі для выжывальнасці нелегітымнай улады праектамі». Тут ідзецца пра будаўніцтва і працу марскіх тэрміналаў для экспарту ўгнаенняў.
Акрамя таго, неназваныя крыніцы звязваюць гэтую справу з затрыманнем кіраўніка і ўласніка прыватнай кампаніі «Сіфуд-Сэрвіс» Віталя Петрукевіча. Гэтая фірма прапануе транспартава-экспедыцыйныя паслугі ў галіне міжнародных грузаперавозаў.
Якуб Хруст belsat.eu
