«Уначы – мёртва». У чэргах на выезд з Беларусі налічылі 700 легкавікоў, час чакання ў «Беняконях» – 29 гадзінаў
Сітуацыя ў памежных пунктах на выездзе ў краіны ЕЗ не паляпшаецца. Паводле звестак Памежнага камітэту Беларусі на 8 раніцы, у чэргах – 700 легкавікоў. У чатах пішуць, што выезду ў Польшчу даводзіцца чакаць амаль содні.
«Уначы – мёртва. Амаль не рухаліся», – пішуць у Telegram-чатах падарожнікі, якія проста зараз стаяць у чарзе перад пунктам пропуску «Варшаўскі мост – Тэрэспаль».
Сёння мяжу мінулі тыя, хто стаў у чаргу яшчэ раніцай у суботу. Чакаць давялося амаль содні.
На аўтобусе – шпарчэй, але таксама доўга, не менш за 12 гадзінаў.
Паводле звестак Памежнага камітэту Беларусі на 8 раніцы, у чарзе ў Берасці – 400 легкавікоў і 2 аўтобусы.
Пры гэтым адзначаюцца сур’ёзныя затрымкі перад «Тэрэспалем» на заезд у Беларусь. На легкавых даводзіцца чакаць 16 гадзінаў.
«Чарга калом стаіць. Такое адчуванне, што нашыя на працу забілі».
Аўтобусам таксама не хутка: каля 8–10 гадзінаў.
21 гадзіну даводзіцца чакаць і ў «Каменным Лозе» вы наезд у Літву. Цяпер там, паводле памежнага камітэту, 170 аўтаў. Аўтобусаў у чарзе нібыта няма, але яны захрасаюць перад літоўскім кантролем, там іх 8, паведамляюць відавочцы. У суботу ўвечары мінання мяжы чакалі каля 5 гадзінаў, а сённяшнім не пашчасціла: дагэтуль стаяць аўтобусы, якія прыехалі на пункту пропуску ўначы.
У «Беняконях», як пішуць у чатах, усё кепска. Падарожнікі сцвярджаюць, што на легкавіках давялося чакаць 28–29 гадзінаў. Літоўскія службоўцы ў сумежным пункце «Шальчынінкай» пільна даглядаюць рэчы і прымушаюць выкідаць запакаваныя харчы. Паводле памежнага камітэту Беларусі, там у чарзе зараз 100 аўтаў. Пры гэтым аўтобусы прапускаюць хутка, патрабуецца некалькі гадзінаў, хаця «усе сумкі ва ўсіх паглядзелі да дна». Зараз аўтобуснай чаргі ў «Беняконях» няма.
Выезду ў Латвію даводзіцца чакаць каля 7–8 гадзінаў. Зараз у «Грыгароўшчыне» 30 легкавікоў.
Сцяпан Кубік belsat.eu
